Ноябрьның 27-ниң хүнүнде «Уругларны тыва чоннуң ёзу-чаңчылдары-биле таныштырары» деп барыын кожууннарның өөредиглиг семинары Барыын-Хемчик кожууннуң Барлык суурнуң «Салгал» уруглар садынга болуп эрткен.

Семинарның теориялыг кезээнге Делегей чергелиг школа назыны четпээн уругларның өөредилге академиязының психология эртемнериниң кандидады Мария Лилюхина, Өөредилге яамызының ниити билиглер килдизиниң специализи Урана Допул, Национал школа хөгжүдер институттан Альбина Монгуш база Снежанна Ондар лекцияларны номчаан.

Практиктиг кезээнге ук уруглар садының кижизидикчилери болгаш специалистери башкылаашкын талазында арга-дуржулгазын Бай-Тайга, Сүт-Хөл, Өвүр, Чөөн-Хемчик кожууннардан келген башкылар-биле үлешкен. Уруглар садының хөгжүм удуртукчузу Андриян Сергештей «Үш чүүл эртемниг оол», күш-культура башкызы Полина Сергештей «Бичии эзирлер - спортчу уруглар» деп ажык кичээлдерни эрттирген.

Оон аңгыда чаартылгалыг шөлчүгештиң ажыл-чорудулгазынга «Салгал» уруглар садының кижизидикчи башкылары Шончалай Хертек, Анита Кужугет, Аряна Монгуш, Наталья Ооржак болгаш өскелер-даа идепкейлиг киришкеннер. Хемчегниң түңнелинде мындыг хевирлиг өөредиглиг семинарлар үргүлчү болурун келген башкылар күзээн.