Тываның школалары «Өөредилге» национал төлевилел езугаар 47 автобусту немей алган. Чаа автобустарны машина-техниказы эргижирээн школаларже чоруткан. Республиканың өөредилге албан черлериниң төлээлеринге чаа чычааннарның дүлгүүрлерин тыпсып тура, регионнуң удуртукчузу Владислав Ховалыг уругларның школаларже чедер оруу айыыл чок болурун демдеглээн.

«Бо тос дугаар чыл Тываның школаларын чаа автобустар-биле четчелеп турарывыс ол. Ол дээрге федералдыг шиитпирлерниң боттанылгазы-дыр. Ооң артында чурттуң Президентизи Владимир Владимирович Путин турар. Тожу болгаш Мөңгүн-Тайга дээн ышкаш ырак-узак, чедери берге кожууннарның орук-чириин барымдаалааш, оларга таарымчалыг машиналарны хувааган. Автобустарны чаа туттунуп турар Сукпак база Мөңгүн микрорайоннарның школалары база алыр. Республиканың школаларының автопарыгын чаартыр дээш федералдыг төп-биле ам-даа улаштыр ажылдаар бис. Келир чылын 25 автобусче чагыгны белеткеп тур бис. Уругларның айыыл чок чоруу - бистерге эң-не кол айтырыг. Уругларывыс эки өөренирин, башкыларының база ада-иелериниң чагыг-сүмезин дыңнап чоруурун күзээр-дир мен» - деп, Владислав Ховалыг демдеглээн.

Автобус бүрүзү чугула херекселдер-биле дериттинген: тахографтар, дүргенин кызыгаарлаар база навигациялыг херекселдер дээш оон-даа өске. Чаа автобус алган школаларның санында Тес-Хем кожууннуң үш өөредилге албан чери база бар.

«Өөредилге» национал төлевилел езугаар Тес-Хемниң 3 школазы амгы үениң айыыл чок негелделеринге дүүшкен автобустарны алган. Самагалтай, Берт-Даг, Кызыл-Чыраа суурларның школалары чаа автобустарның дүлгүүрлерин алганы өөрүнчүг. Ол чүүл Тес-Хем кожууннуң өөредилге адырынга позитивтиг өскерлиишкиннерниң, чедиишкиннерниң үндезини болбас арга чок. Чаа автобустарның ачызында уруглар айыыл чок болгаш таарымчалыг байдалга школага чедип алыр аргалыг, оон аңгыда ырак-узак сумуларның өөреникчилеринге таарымчалыг байдалдар тургустунар. Кады ажылдажылга-биле өөредилге ажыл-чорудулгазын шынарлыг болгаш чогумчалыг кылып алырынга бүзүрелдиг бис. Шак мындыг улуг деткимчеңер дээш четтирдивис!» - деп, Тес-Хем кожууннуң өөредилге эргелелиниң начальниги Елена Эртине чугаалаан.