Главная
Февраль 9-та чалыы армейжилер болгаш 8, 10 классчы кадеттер ортузунга «Z поэзия» уран номчулга мөөрейи болур. Ону Улуг Тиилелгениң 80 чылынга база Ада-чурт камгалакчызының чылынга тураскааткан.
Хемчегниң кол сорулгазы – тускай шериг операциязының киржикчилериниң маадырлыг чоруунуң үлегер-чижээнге аныяк-өскенниң патриотчу үзел-бодалын хевирлээри, шериг хүлээлге күүселдезинге хүндүткелди кижизидери.
«Фестиваль-мөөрей салым-чаяанныг аныяктарның шөлчүгежи болур, олар Төрээн чурт камгалакчыларының маадырлыг чоруунуң дугайында шүлүктерниң уран номчулгазын бараалгадыр. Оолдар, уруглар чүгле боттарының салым-чаяанын көргүзер эвес, а жюри кежигүннеринден үнелиг арга-сүмени алырлар» - деп, «Чалыы армейжилер» регионалдыг штабтың удуртукчузу Айдын Шивидек чугаалаан.
Фестиваль-мөөрейниң организакчызы – Тываның «Чалыы армейжилер» регионалдыг салбырның деткимчези-биле Кызылдың Президентиниң кадет училищези.
