Главная
Улуг-Хем кожууннуң Шагаан-Арыг хоорайда туризм төвүнге Улуг-Хем, Каа-Хем болгаш Чаа-Хөл башкыларының аразынга «Авамның хуулгаазын аптаразы» Ажык эжик хүнү февральдың 7-де болуп эрткен.
Хемчегниң хүн чурумун таарымчалыг кылдыр тургускан болгаш, илеткелчи башкылар боттарының үезин шын сагып, кол кезээнде кичээл эрттиреринге таарымчалыг байдалдарның өөредилгезин уруглар албан черлериниң эргелекчилеринге, тыва дылдың, уран чүүлдүң башкыларынга таныштырган. Кожууннуң чаргырга даргазы Радж Баз-оол аалчыларга үнүп олурар чылан чылы-биле байыр чедирип, ажыл-ижинге чедиишкиннерни күзээн.
Туризм төвүнүң удуртукчузу Чойганмаа Даваа хемчегни удуртуп эрттирген. Шуулган-өөредилгениң киржикчи башкылары Монгуш Валерия Эдуардовнаның «Улуг-Хем кожууннуң онзагай черлериниң дугайында», Кыргыс Мира Монгушевнаның «Салгал дамчаан тыва эдилелдер», Кыргыс Чечеймаа Минчиир-ооловнаның «Тыва өг - октаргай», Арыскан ортумак школазының музейиниң удуртукчу башкызы, Ийи-Тал аграрлыг школаның кижизидикчи башкызы Сурун-оол Инга Монгушевнаның «Кырган-авам алдын аптаразы», Шагаан-Арыгның 4 дугаар Челээш аттыг уруглар садының кижизидикчи башкызы Норбу Римма Маадыр-ооловнаның «Тыва сыртыктарның 9 аңгы хевири», Арыг-Үзүү суурнуң культура төвүнүң уран чүүл удуртукчузу Тулуш Саяна Ондаровнаның «Угуң-дөзүң кайыын дизе, ааткыыштыг кавайымда», Арыг-Үзүү суурнуң «Теремок» уруглар садының кижизидикчи башкызы Кыртынмай Ираида Михайловнаның «Аът чарыштырары» болгаш туризм төвүнүң удуртукчузу Даваа Чойганмаа Николаевнаның «Амгы үеде өлчей ырының чаш уругнуң аажы-чаңын кижизидеринге болгаш кижи болуп хевирлеттинеринге салдары» деп көргүзүглүг илеткелдерин башкылар улуг сонуургал-биле дыңнап, көргүзүг херекселдери-биле таныжып, арга-сүмезин солушканнар.
«Өөредиглиг шуулганның ажыл-ижи бичии уругларга байырлалдар болгаш кичээлдер эрттиреринге таарымчалыг» - деп, башкылар түңнээн. Шак мындыг өөредиглиг хемчеглерни кожууннар аразынга эрттирирери кижидикчи башкыларның арга-дуржулгазын бедидип, школа назыны четпээн уругларның дыл-домаан сайзырадырынга, төрээн тыва дылывысты болбаазырадып, байыдарынга ужур-дузалыг деп, олар саналдааннар.
Шуулганга Национал школа хөгжүдер институттуң методист башкызы Монгуш Альбина Анатольевна киржип, башкыларның белеткелин бедик шынарлыг деп демдеглээн.
Өөредиглиг шуулган дараазында Каа-Хем кожууннуң Кундустуг суурунуң Челээш аттыг уруглар садынга февраль 28-те эртер.
