Ортумак өөредилгениң федералдыг технопарыгынга «Профессионалитет» төлевилелдиң 2025 чылда чаа кластерлериниң программаларын камгалаан. Хемчегге Россияның 50 регионундан экономиканың 17 кол адырының 95 кластериниң төлээлери киржип келген. «Профессионалитет» федералдыг төлевилел «Аныяктар болгаш уруглар» чаа национал төлевилелче кирип турарын сагындыраал.

Аңаа бистиң республикавыс тудуг болгаш даг тывыжының талазы-биле чаа кластерлерниң программаларын таныштырган. Регионнуң делегациязынче Тываның тудуг техникумунуң директору Радислав Наважап база Ак-Довурактың даг техникумунуң директору Байлак Кужугет кирген. Ол ышкаш Өөредилге яамызындан Олимпия Ондар, ажыл берикчилери Тываның даг-руда компаниязының чиңгине директору Валерий Куликов база «Архат» КХН-ниң чиңгине директору Айдыс Чаксым республиканы төлээлээн.

Бистиң регионувуста 2023 чылдан бээр Тываның Баштыңы Владислав Ховалыгның деткимчези-биле «Профессионалитет» төлевилелдиң иштинде «Көдээ ажыл-агыйы» кластер боттанып турарын сагындыраал. Төлевилел езугаар өөредилгениң чаа модельдерин киирип, мастерскаяларны сайзырадып, ортумак өөредилге чериниң материал-техниктиг баазазын экижиткен. Специалистерни белеткеп тургаш, кол акцентизи бүдүрүлге практикаларынче угландырган. Студентилер Тываның кол бүдүрүлгелеринге ажылдаар аргалыг болган. А 2025 чылдың сентябрь 1-ден эгелээш, Тываның тудуг техникуму база Ак-Довурактың даг техникуму боттарының өөредиглиг программалары езугаар ажылдап, тудуг болгаш даг адырының чаа кластерлерин эгелээр.

💬«Федералдыг деткимчениң дузазы-биле тудуг адыры шимчеп, ооң хөгжүлдезин чедип алган бис, ол ышкаш Тастыгда литийниң мөөң чыдымын ажылдап кылыр инвестор тывылганы-биле, регионга бо адырларның өөредилге-бүдүрүлге кластерлери тургустунганы кончуг үезинде» - деп, Владислав Ховалыг демдеглээн.

#Тыва #Тува #образованиевТуве #профессионалитет