Бо хүннерде Барыын-Хемчик кожууннуң девискээринде «Таежный» лагериниң чемненилге блогунуң болгаш эмнелге пунктузунуң септелгези чоруп турар. Ол дугайында Тываның Баштыңы Владислав Ховалыг бодунуң блогунда дыңнаткан.

💬«Барыын-Хемчик кожууннуң девискээринде «Таежный» лагериниң столоваязын болгаш эмнелге пунктузун чаартыры-биле, септелге ажылдары чоруп турар. Объектини май айда хүлээдири чугула. Чайгы сезон үе-шаанда эгелээр ужурлуг.

Бир ай четпес үе дургузунда дыка хөй ажылдар кылдынган. Соңгаларны, эжиктерни, дээвиирни база шалаларны бүрүнү-биле солуп турар. Чылыдылга системазы болгаш изиг сугну хандырар котелдарны тургузуп эгелээн. Бо чылдан тура Россияның Чырыдыышкын яамызының деткимчези-биле уругларның кадыкшылын быжыглаары база дыштанылгазынга таарымчалыг байдалдарны тургузар дээш стационарлыг лагерьлерни чаартыр ажылдар эгелээн. Келир чылын Улуг-Хем кожуунда «Чодураа» лагеринге 60 олуттуг ийи корпусту тудар, ол ышкаш Тес-Хемниң девискээринде «Сайлык» лагериниң столоваязын болгаш эмнелге пунктузунуң капитал септелгезин чорудар» - деп, Тываның Баштыңы демдеглээн.