Главная
Тываның өөредилге сайыдының хүлээлгезин күүседип турар Ренат Ооржак янзы-бүрү мөөрейлер, фестивальдар база олимпиадаларның киржикчилери, «Дириг классика» бүгү Россия мөөрейниң регионалдыг чадазының тиилекчилери Дарина Артына, Алдын-Сай Саая, Изабелла Лаа-Есипова-биле ужурашкан.
База бир салым-чаяанныг школачылар, янзы-бүрү мөөрейлер, фестивальдар база олимпиадаларның киржикчилери, «Дириг классика» бүгү Россия мөөрейиниң регионалдыг чадазының тиилекчилери Дарина, Алдын-Сай, Изабелла-биле ужураштым. Уруглар «Артек» бүгү делегейниң уруглар төвүнче аъттаныпкан, аңаа мөөрейниң түңнел чадазынга киржирлер. Оларга бо смена онзагай болур, чүге дизе «Артек» бо чылын 100 харлаан!
Ужуражылгавыс ажык чугаа кылдыр эртти. Элээди номчукчулар боттарының чедиишкиннерин, сонуургалдарын база келир үеде планнарын чугааладылар.
Чижээлээрге, Кызыл хоорайның 8 дугаар школазының өөреникчизи Дарина Артына школаны доозупкаш, журналист болур күзелдиг. Амгы үеде ол кыдат болгаш көрей культураны сонуургаар – очулгалар кылырынга ынак. Оон аңгыда Дарина 8 чыл улаштыр хөгжүм школазынче барып турар, ол биске билдингир чогаалдардан үзүндүлерни скрипкага ойнап берди.
Мөөрейге ийиги черни ээлээн Саглы школазының өөреникчизи Алдын-Сай Саая биле үшкү черге төлептиг болган Изабелла Лаа-Есипова – Шагаан-Арыгның 1 дугаар школазының өөреникчизи база боттарының дугайында чугаалап, лагерьге чүү болурун баш бурунгаар даап бодап, күзелдери-биле үлешкен. Уруглар «Артекче» бир дугаар барып турар. Олар чогаадыкчы салым-чаяанныг – кайызы-даа чуруурунга ынак. Изабелла юрист азы архитектор болур күзелдиг, амдыызында боданып турар.
Дарина Артына «Артекке» ооң мурнунда база чораанын чугаалады. Уруглар төвүнге дыштанып тургаш, эштип өөренип алганын таныштыргаш, бодунуң эштеринге эки дыштанылганы күзээн.
Өөредилге системазының база бир чугула угланыышкыннарының бирээзи – салым-чаяанныг уругларны деткиири. Шак мындыг олимпиадалар, мөөрейлер таварыштыр салым-чаяанныг уруглар илерээр. Чогаадыкчы уругларның чаяанын сайзырадыр дээш, өй-шаанда өөредилге маршрудун тургузуп алыры чугула. Оон аңгыда уругларның ада-иезинге тускай өөрүп четтиргенимни илереттим. Олар уругларга бүзүрелди оттуруп турар.
Бо мөөрей Россияда 2011 чылдан бээр эртип турар, а Тывага 2012 чылда болуп эгелээн. Ол классиктиг чогаалды нептередир, өг-бүлеге чаңчылчаан номчулганы диргизер, уругларның билиин бедидер база аныяк-өскен ортузунга эстетиктиг кижизидилгени чорудар сорулгалыг.
Уругларга байыр чедирип тур мен! Чедиишкинниг болзуннар! Мөөрейниң түңнел чадазынга Тываның адын төлептиг камгалаарыңарга бүзүреп тур мен» - деп, Ренат Ооржак демдеглээн.