Бо чазын регионнуң элээн каш өөредилге объектилеринде: уруглар садтарында, школаларда база техникумнарда капитал септелге ажылдары эгелээн. Мөңгүн-Тайга кожууннуң Мугур-Аксы суурунда «Чечек» уруглар садының капитал септелгези Россия Федерациязының Президентизиниң эгелээни «Өг-бүле» деп чаа национал төлевилелдиң күүселдези езугаар кылдынар.

Школа назыны четпээннерниң өөредилге албан черинде 80 уруг кээп турар. Өөредилге яамызының специалистери объектини база катап хынааш, ажылдың хемчээлин тодараткан. Амгы үеде оран-саваның ишти-даштында бузар ажылдар доозулган. - Тудугда чазып, бузар ажылдар доозулган. Амгы үеде кырын болгаш дээвиирлерин чаартып кылып турар. Иштики өрээлдер шуут өскерли бээр. Уруглар садын чаагайжыткаш, соңгаларын, эжиктерин, даштын бүрүнү-биле солуур. Тудуг материалдары бар, оларны доктаамал чедирип турар. Август айдан эгелеп чаарттынган уруглар сады чаштарны хүлээп эгелээрин планнаан бис – деп, Владислав Ховалыг бодунуң блогунда бижээн.

Бо чылын «Аныяктар болгаш уруглар» национал төлевилелдиң «Уругларга бүгү-ле экини» база «Профессионалитет» федералдыг төлевилелдериниң күүселдези-биле Тывада 6 – Сукпак, Бора-Тайга, Кызыл-Даг, Аксы-Барлык, Чыргаланды, Хову-Аксы суурларда школаларны, ол ышкаш Тываның агроүлетпүр техникумун бүрүнү-биле септеп чаартыр. Айыттынган черлерде септелге ажылдары апрельдиң 1-де эгелээн. Тываның Өөредилге яамызының ажыл-чорудулгазын хандырар тускай төптүң специалистерин объект бүрүзүнге харыысалгалыг кылдыр томуйлаан, олар ажылдың чорудуун хүннүң-не хайгаарап турар. Өөредилге сайыдының хүлээлгезин күүседип турар Ренат Ооржак ажылдың чорудуун болгаш шынарын бодунуң хууда контролюнда алган. #нацпроекты