Республиканың 9-ку классчылары англи болгаш тыва дылдарга шылгалданы дужааган. Ниитизи-биле 1699 өөреникчи шылгалданы дужааган, 25 пункт ажылдаан, күрүнениң шылгалда комиссиязының 82 кежигүнү хаара туттунган, 97 техниктиг специалист база 552 организатор, 97 хөй-ниити хайгааракчызы киришкен.

Тоску класстың доозукчуларының аразындан тыва дыл эртеминге шылгалда дужааган уругларның саны эвээш эвес болган.

«Кызыл хоорайның 9 дугаар гимназиязы 9-ку классчыларның баштайгы шылгалдазын өске бүгү школалар-биле бир деңге эрттирген. Уруглар тыва болгаш англи дылдарны шилип алган. Мээң башкылап турар клазымдан 12 уруг тыва дылга шылгалданы дужаады, өске класстардан база элээн хөй уруглар бар. Олар шупту 8 класстан тура-ла дужаар эртемнерин шилип ап, шылгалдага белеткенип эгелей бээр. Бүдүн өөредилге чылының дургузунда немелде кичээлдер болгаш консультацияларны эрттирген. Дүүн тыва дыл шылгалдазын шилип алган уруглар барык 3 шак дургузунда эдертигни болгаш сөзүглелге даянгаш, чогаадыгны биживишаан, тест айтырыгларынга харыылааннар. Ниитизи-биле уруглар эки белеткелдиг болгаш, шылгалдага улуг дүвүрел чокка киришкеннер» - деп, Кызыл хоорайның 9 дугаар школазының тыва дыл башкызы Малина Солун-оол демдеглээн.

Баштайгы шылгалда хүнүнде уруглар боттарының күжүнге, билиинге бүзүрелди илереткеннер.

Кызыл хоорайның 9 дугаар гимназиязының 9 «ж» клазының өөреникчизи Айнагуль Очур-оол мынчаар чугаалаан: «Төрээн дыл эртеминге шылгалданы эки дужаадым. Тестиниң айтырыгларынга харыылаары ындыг-ла берге эвес болду. Оон аңгыда чогаадыг бижииринге база улуг-ла бергедевээн мен. Тыва дылда номнарны үргүлчү номчуп турдум. Колдуунда-ла кижиниң сөс курлавыры база чугула черни ээлеп турар деп бодаар мен».

Тоску классчыларның дараазында шылгалдазы май 26-да болурун сагындыраал.

Чурукту социал четкилерден алган.

#огэ #минобразованиятувы