Главная
Тывада химия эртеминге чаңгыс аай күрүне шылгалдазын 100 баллга дужааган 3 доозукчу бар. Оларга Тываның Баштыңы Владислав Ховалыг байырны чедирген.
«Химия эртеминге шылгалданың түңнелдери билдинген. Республикада 100 баллга дужааган хары угда 3 доозукчу бар. Кызылдың 9 дугаар гимназиязындан Ай-Шуру Белек-оол, Таңдының Сосновка ортумак школазындан Адыгжы Оюн, Кызылдың 5 дугаар гимназиязындан Тахир Ондар тергиин билиглерин көргүзүп, бедик баллдарны алган. Оларның башкыларынга база байырым чедирдим: Джемма Сергеевна Бычковага, Елена Диин-ооловна Ондарга, Мариета Малчыновна Салчакка.
Доозукчуларның чоок кижилери база төрелдериниң кайы хире сагыш совап турарын билип тур мен. Хөй кезиинде чаңгыс аай күрүне шылгалдаларының түңнелдеринден өөредилге черин шилип ап, улуг амыдыралче кирер болгай. Ниитизи-биле 608 кижи химияга шылгалданы дужааган. 99 баллдыг бедик көргүзүглерни Кызылдың президентиниң кадет училищезиниң база Тываның Күрүне лицейиниң доозукчулары чедип алган. Шылгалдалар уламчылап турар. Чедиишкиннерни күзедим» - деп, регионнуң Баштыңы бодунуң блогунда бижээн.
Ол ышкаш чаңгыс аай күрүне шылгалдазын бедик көргүзүглерге дужааган доозукчуларга болгаш өскелерге-даа Тываның өөредилге сайыдының хүлээлгезин күүседип турар Ренат Ооржак байыр чедирген.
«Байыр чедирип тур мен, уруглар, оолдар! Күзелиңерни бүдүрүп, чурттуң дээди өөредилге черлеринче дужаап кирип алыр орууңар ак болзун . Ол ышкаш өске-даа доозукчуларга шупту шылгалдаларны чедиишкинниг дужаап алырын күзеп тур мен» - деп, сайыт демдеглээн.