«Чаш назынның навигаторлары» федералдыг төлевилелдиң 2024-2025 өөредилге чылында ажыл-чорудулгазының түңнелин үндүрген. Төлевилелди республиканың школаларында болгаш техникумнарында директорнуң кижизидилге талазы-биле чөвүлекчилери боттандырып турарын сагындыраал.
Тывада ниитизи-биле 156 чөвүлекчи бар, олар 140 школада база 16 ортумак өөредилге черинде хаара туттунган. 2025 чылдан тура чөвүлекчилерниң ажыл-чорудулгазы Президентиниң «Аныяктар болгаш уруглар» национал төлевилелиниң деткимчезинче кирип турар.
«Тывада «Чаш назынның навигаторлары» төлевилелдиң координатору Сергей Лопсанның демдеглээни-биле алырга, бо өөредилге чылында мөзү-бүдүш, патриотчу болгаш күш-ажыл кижизидилгезинге хамаарышкан янзы-бүрү хемчеглерже хаара туттунган школачыларның, студентилерниң саны оранчок көвүдээн.
«Чаш назынның навигаторлары» төлевилелдиң чугула хемчеглериниң бирээзи – чурттуң Президентизи В.В. Путинниң Тывага кээп, регионнуң Баштайгыларының хайгаарал чөвүлелиниң ажылынга киришкени. Аңаа бистиң чөвүлекчилеривис идепкейлиг киришкен. Навигаторларның хемчеглеринге идепкейлиг киржилгези база чедиишкиннери дээш 70 ажыг оолдар, уруглар «Артек», «Смена», «Орленок», «Океан» лагерьлеринге дыштанган, а 100 ажыг педагог «Артек», «Океан» дыштанылга төптеринге, «Машук» билиглер төвүнге, Новосибирск болгаш Омск хоорайларның дээди өөредилге черлеринге билиин бедиткен. Амгы үеде «Россияның бичии эзирлери» төлевилелдиң одуруунда 22 муң школачы бактаап турар, ол ышкаш «Тыва Республиканың школа назыны четпээн уруглары – бичии эзирлери» регионалдыг төлевилелди чедиишкинниг боттандырганнар.
Навигаторларның грант ажыл-чорудулгазының дугайында демдеглээри чугула. Чаңгыс өөредилге чылының дургузунда кижизидилге ажылын хөгжүдери болгаш ада-ие биле уругнуң харылзааларын күштелдирери-биле 20 ажыг сая рубльди регионче эккелген.
Кызымаккай, креативтиг ажыл-ижиңер болгаш кады ажылдажылга дээш четтиргенимни илереттим. Тывавыстың уруг-дарыының чаагай амыдыралы дээш чаа-чаа бедиктерни, чедиишкиннерни күзедим» - деп, регионнуң өөредилге сайыдының хүлээлгезин күүседип турар
Ренат Ооржак демдеглээн.
