Тывага ийи муң ажыг аныяктар школачы амыдырал-биле байырлажып, улуг орукче – чаа-чаа билиглер-биле, чырык сактыышкыннар болгаш уттундурбас үелер-биле долган студент чуртталгаже киргеннер. Оларның аразындан бир чүс бежен хире кижи бирги болгаш ийиги чергениң «Өөредилгеге онзагай чедиишкиннери дээш» деп шаңналдарга төлептиг болган, ол дээрге алдын база мөңгүн медальдар.

Доозукчу кежээлер хары угда республиканың шупту районнарынга эрткен. Байырлыг хемчеглерниң иштинче Россияның Чырыдыышкын яамызының сайыды Сергей Кравцовтуң, Тываның Баштыңы Владислав Ховалыгның база кожуун бүрүзүнүң кураторлары - регионнуң Чазааның кежигүннеринден байыр чедириишкиннери, концерттер, башкылардан болгаш ада-иелерден чылыг-чымчак сөстер, аттестаттар тывысканы база чарлыышкынның вальызы кирген. Школачы үе оолдар, уругларның сагыш-сеткилинге чараш найырал, баштайгы ынакшыл база улуг идегелдер-биле уттундурбас болуп артар.

Бөгүнгү доозукчуларның хөй кезиинге улуг амыдыралче аян-чоруктуң баштайгы базымы-дыр – чаа ажыдыышкыннар, чедиишкиннер, кыйгылар. Кижи бүрүзүнүң мурнунда – боду дээш харыысалга, чурттуң дээди өөредилге черлеринге студенчи амыдырал, келир үениң мергежилин чедип алыры.

Тываның чалыы хамаатыларынга ак орукту күзедивис! Школачы коңга чүректериңерге ам база катап кыңгырт кылдыр эдип, кижи бүрүзүнге найыралды хумагалаары, билиглерин үнелээри, күзелдеринче болгаш чедиишкиннерже чүткүүрү чугула дээрзин сагындырар болзун.

Менди-чаагай, эргим оолдар, уруглар!а