«Бүдүн Тывада болгаш оон дашкаар билдингир «Восток» компаниязы-биле Сергей Васильевич Уюсов чаңгыс чер чурттугларынга бо кайгамчык белекти сөңнээн. Сергей Васильевичиниң шагда ажылдап чорааны Чадаананың автотранспорт бүдүрүлгези турган черде амгы үеде чаа школаны тудуп үндүрген. Хөй чылдар дургузунда хоорайның эң-не көскү черинге турган алдарлыг бүдүрүлгениң бузундуларының орнунга, чүгле чадаанажыларны эвес, а хоорайны таварып эртер кижи бүрүзүн өөртүптер чараш тудугну маңаа тудар деп шиитпирлээн бис» - деп, республиканың Баштыңы Владислав Ховалыг чугаалаан.

 

Башкыларның, уругларның, ада-иелерниң арын-шырайында магадап, өөрүп турарын көөрү өөрүнчүг-дүр деп, регионнуң баштыңы база үлешкен. Ниити билиг школазы чаа эт-сеп, амгы үениң дериг-херекселдери-биле дериттинген, хуралдаар улуг залдыг, 180 олуттуг столоваялыг, ийи спортчу залдыг, бир тренажер залы-биле чепсегленген. Школа көрүкчүлер олурар ийи трибуналыг стадионнуг, а херим иштиниң девискээрин чаагайжыткан.