Барыын-Хемчик кожууннуң Хөнделең сумузунда 400 ажыг кижи чурттап турар, а школазында чүгле 30 хире өөреникчи бар. Школа биче комплектилиг кылдыр санаттынар болгаш, республиканың өске бүгү школалары ышкаш чаарттынып турар. «Өөредилге» национал төлевилел езугаар школаның 30 өөреникчизинге амгы үениң чурагайлыг лабораториязын дараазында эртемнерге ажыткан: физика, химия, биология болгаш робототехниканың эң-не тергиин лабораториязы – бо бүгү «Өзүлдениң базымнары» бойдус-эртем болгаш техниктиг өөредилге төвүнде.

Чаа өөредилге чылының эгезинде школачыларны төптүң дериг-херекселдери-биле таныштырган. Башкылар өөредилгеге практиктиг угланыышкынны ажыглап эгелээн, а уругларга школа программазын эки шиңгээдип алырынга дузалыг. Школада 11-ги класстың доозукчузу чүгле 1 кижи – Анастасия Черкасова. Доозукчунуң чугаазы-биле алырга, бо чылын күрүнениң чаңгыс аай шылгалдаларынга белеткениринге аңаа таарымчалыг байдалдар тургустунган. Ол эмчи болур күзелдиг. Башкылар Настяның дээди өөредилге черинче дужаап алырынга бүзүрелдиг.

Амгы үеде Тывада 144 «Өзүлдениң базымнары» төптер ажылдап турар, оларның 16-зы бо чылын ажыттынган. Шынарлыг билигни чедип алырынга республиканың янзы-бүрү суурларында болгаш биче хоорайларында 20 муң ажыг уругга таарымчалыг байдалдарны тургускан.