Өөредилге адырының чаартылгазы уламчылап турар. Сөөлгү үш чыл дургузунда республиканың девискээринде 46 школа септеттинген болгаш чаа дериг-херекселдер-биле чүметтинген. Ол дугайында Тываның Баштыңы Владислав Ховалыг бодунуң блогунда бижээн.

🗯«Бо чылын база чаартылгаларны уламчылаар бис. Капитал септелге программазынче Кызыл кожууннуң Сукпак ортумак школазы, Чеди-Хөлде Хову-Аксының школазы, Тес-Хем кожуунда Чыргаланды, Сүт-Хөлде Бора-Тайга, Барыын-Хемчикте Аксы-Барлык, Бай-Тайгада Кызыл-Даг суурларның школалары кирген.

Өөредилге албан черлериниң капитал септелгези президентиниң «Аныяктар болгаш уруглар» чаа национал төлевилелиниң кезээ апарган. Өөредилге болгаш Тудуг яамыларынга бо талазы-биле ниити кады ажылдажылганы кылырын даастым. Оон аңгыда кожууннарның удуртукчулары септелгениң ажыл-чорудулгазын хынап, тус черге деткимчени көргүзер ужурлуг» - деп, Тываның Баштыңы демдеглээн.

#нацпроекты