«Өөредилге» национал төлевилелдиң «Амгы үениң школазы» федералдыг төлевилели езугаар спорт залдыг, 176 олуттуг школаны Мөңгүн-Тайга кожуунда тудуп турар. «Бастион» КХН тудуг организациязы тудугнуң 35 хуузун тудуп үндүрген.

Мөңгүн-Тайга кожуун чедери ырак болгаш берге болганындан тудуг материалдарынга база үе-шаанда объектини дужаарынга салдарны чедирген. Ынчалза-даа Тываның Баштыңы дараазында өөредилге чылында уруглар таарымчалыг байдалга өөренип ужурлуг деп дыңнаткан.

«Тудугжулар бо чылын объектиниң кырын бүрүнү-биле дуглаптар планныг. Келир чылда тудуг ажылдарын доозуп, чогуур коммунал инфраструктураны кииргеш, ажыглалче киирер ужурлуг. Келир чылын Билиг хүнүнде оолдар, ургулар чаа парталар артынга олурупкаш, Кызылдың школаларында үе-чергелери ышкаш байдалдарга өөренип эгелээрлер» - деп, Владислав Ховалыг хууда блогунда бижээн.

Бөгүнде тудугжулар ханаларны салып, кырын плитка-биле дуглап, эптээр тудар ажылдарда хаара туттунган. Объектиде 27 тудугжу, беш санныг техника ажылдап турар.