Главная
Чаа-Хөл кожуунга кижизидилге талазы-биле Штабтарда ажылдап чоруур башкыларның өөредиглиг интенсиви эрткен. «ПроВоспитание» өөредиглиг хемчег кожууннуң шупту школаларындан 60 ажыг төлээни хаара туткан болгаш, кижизидилге талазы-биле аргаларны экижидер база арга-дуржулга солчур шөлчүгеш болган.
Өөредиглиг хемчег лекциялар болгаш дискуссиялар хевиринге эртип, киржикчилерниң кижизидилге темазы болгаш уругларның сайзыралынга хамаарышкан айтырыгларны сайгарып чугаалажырынга идигни берген. Ооң лекторлары – Республиканың немелде өөредилгезин хөгжүдер төптүң база «Чашкы назынның навигаторлары» федералдыг төлевилелдиң специалистери.
Специалистерниң демдеглеп турары-биле алырга, интенсив үезинде школаларга кижизидилге айтырыының ажылчын программазын актуализастаары, өөреникчилер-биле профилактиктиг ажылдарны чорударының аргаларын дилээри база ук айтырыгларны бурунгаар шиитпирлээри-биле, үре-түңнелдиг хемчеглерни чорудары кол черни ээлээн. Оон аңгыда школадан лагерьже чиик шилчиир чаңгыс аай арганы ажыглаар сорулга-биле специалистер уругларның дыштанылга лагерьлеринге кижизидилге ажылының федералдыг программазын таныштырган.
Өөредилгениң киржикчилери профильдиг специалистерден сонуургаан айтырыгларын салып, боттарының амыдыралда таваржып турар байдалдарын сайгарып чугаалашканнар. Хемчегниң организаторлары арга-дуржулга солчулгазын база кожууннуң школаларының аразында кижизидилге талазы-биле кады ажылдажыжылганы чугула деп демдеглээннер.
Шак-ла ындыг өөредиг Барыын-Хемчик кожуунга эрткенин сагындыраал. Аңаа 80 ажыг педагог киришкен.