Чадаананыӊ 3 дугаар ортумак школазы эрткен өөредилге чылында бодунуӊ үндезилеттингенинден бээр 65 чыл оюн демдеглээн.

1958 чылда школаны Ленин кудумчузунда МТС (машина-техника септээр) албан черинге ажыткан. Эге класстарны орус школага кылдыр ажыглалче киирген, ол уеде школага 5 класс, башкылар өрээли база буфет турган. Школаның баштайгы директорунга Анна Парфиловна Михайлова томуйлаткан. Башкылары кылдыр Любовь Михайловна Немкова, Валентина Сергеевна Медведева, Анна Михайловна Белогоская, Татьяна Васильевна Пулых ажылдап турганнар.

1963 чылда 8 чылдыг орус школа апарган болгаш, тыва эге класстар немешкен. Баштайгы тыва өөреникчилери Елизавета Кууларовна Тамбар, Надежда Кызыл-ооловна Килик дээш оон-даа өскелер.

1975 чылдан эгелеп 8 чылдыг тыва школа апарган база ол-ла чылын школага музей ажыттынган. Республикада эӊ эки ажылдыг музей деп санадып турган. Ол чылдарда өөрникчилерниӊ, ада-иелерниӊ киржилгези-биле кончуг ховар, солун экспонаттар чыгдынган. Музейниӊ ажылын Кара-кыс Чамыяӊ кончуг эки удуртуп турган. Школавыстыӊ хоочуну тыва дыл, чогаал башкызы Дарыш Чымбаевна Севен база школаныӊ музейин алдаржыдып, билдилиг башкарып келгенинге чоргаарланып чоруур бис.

Школавысты удуртуп-башкарып келген директоры:
1. Михайлова Анна Парфилова
2.Чешуин Михаил Александрович
3. Березина Фаина Федоровна
4. Карелин Сергей

1972-1982 чылдарда Афанасий Гаврилович Степанов ажылдаан. Школаны директорлап чораан үезинде коллективти быжыг найыралдыг, демниг, өөреникчилеринге, ажылынга ынак кылдыр ажылдаарынче улуг кичээнгейни салып, арга-сүмезин берип чораан.