Чадаананың чаа школазы уругларны хүлээп алырынга белен

Тываның Баштыңы Владислав Ховалыг республиканың барыын кожууннарынче ажыл-агыйжы сургакчылаашкын үезинде Чадаана хоорайга четкен. «Өөредилге» национал төлевилел күүселдезинде «Аныяктар болгаш уруглар» деп чаа национал төлевилел-биле ажыглалче киирер чаа школаның кайы хире беленин хынаан. Өөредилге чери чаа өөредилге чылында өөреникчилерни хүлээп эгелээринге белеткенип турар.

Регионнуң Баштыңы 616 олуттуг чаа школа тудуунга барып четкен. Каш хонук болгаш ажыттынар объект бүгү Чөөн-Хемчик кожууннуң уругларынга амгы үениң өөредилге төвү апаар.

«Чаа школаның ажыдыышкынын чон четтикпейн манап турар, ол ам хоорайның чараш чери болгаш уруглар болгаш аныяктар чыглыр төп апаар. Школа уругларны хүлээп алырынга барык-ла беленин көрдүм: тудуг ажылдары доозулган, хайгаарал органнарындан чөпшээрел документилери алыр ажылдар чоруп турар» - деп, Владислав Ховалыг бодунуң блогунда бижээн.

Өөредилге яамызы кожуун чагыргазы-биле кады өөредилге албан черин башкы кадрлар болгаш техниктиг ажылчыннар-биле четчелээр.

«Чаа эт-сеп болгаш амгы үениң дериг-херектери шупту чогуур черлеринде тургулапкан. Школаның улуг хурал залы чаражы болгаш таарымчалыы-биле концерт залдарын ажып турар. Улуг маргылдаалар-даа эрттирип болур ийи спорт залдыг база стадионнуг. Ам уругларны быжыг билиглер-биле чепсеглээри арткан» - деп, ол бодалы-биле үлешкен.

Главная