Главная
Бүгү-делегейниң өг-бүле хүнүн таварыштыр эртип турар «Чылдың өг-бүлези» Бүгү-россия чергелиг мөөрейниң регионалдыг чадазының «Өг-бүле – ёзу-чаңчылдарның кадагалакчызы» номинациязынга Айгор, Белекмаа Көшкендейлерниң өг-бүлези үшкү черни ээлээн. Айгор Игорь-оглу биле Белекмаа Андреевна – Кызыл хоорайның 1 дугаар школазында аныяк башкылар. Олар уруг-дарыгны тыва чоннуң ук-төөгүден дамчып келген чаагай чаңчылдарын сагып, ону хүндүлеп база кадагалаарынга өөредип чоруурлар. Хөй уруг-дарыглыг аныяк өг-бүле тыва улустуң хөгжүм культуразының, хөөмей-сыгыттың болгаш чаагай чаңчылдарның кадагалакчылары болуп чоруур. Аныяк башкылар өг-бүлениң чаңчылдары аас-кежиктиң болгаш чаагай амыдыралдың дөзү деп санап турарлар.
Өг-бүле дээрге чүнүң-даа мурнунда улуг күш-ажыл база улуг харыысалга болбайн канчаар. Өг-бүлелерде ажы-төл, хөй нуруузунда, бот-боттарынче көрүп, деңнежип, үлегерин эдерер. Хүндүлээчел болурунга өөренир, улуглары бичиилери-биле кичээлдээр болгаш, чоок кижилериниң дугайында кичээнгейлиг болгаш сагыш човаашкыны-биле ылгалып турарлар.
Ада-ие болуру - нарын-берге болгаш харыысалгалыг. Ажы-төлдү кижизидери дээрге чүгле эртенден кежээге чедир “угаанныг” сургаал кылыры эвес. Кезээде болгаш каяа-даа үлегер болур ужурлуг. А ол ындыг амыр эвес! Ынчангаш ажы-төлүңерге боттарының ада-иези-биле чоргаарланыр кылдыр арганы бериңер» - деп, Айгор биле Белекмаа Көшкендейлер демдеглээн.