«Россияның Чазааның болгаш чурттуң Президентизиниң деткимчези-биле өөредилге инфраструктуразының хөгжүлдезинче улуг кичээнгейни салып турар бис. Тывада амгы үениң чаа школалары ажыттынып турар. Ооң-биле чергелештир башкыларның профессионал өзүлдезинге, мергежилин бедидеринге дузалаары чугула. Элээн каш чыл дургузунда «Чылдың башкызы» мөөрейниң тиилекчизи 1 сая рубльди шаңнал кылдыр ап турар. Тергиин башкыларның болгаш педагогика каттыжылгазының төлээлериниң 35 дугаар юбилейлиг мөөрейи эгелээн. Бо чылын кол шаңнал дээш 246 башкы демисежир. Мөөрейниң ат-алдары чылдан чылче бедип, бодунуң арга-дуржулгазын көргүзеринге белен, уруглар кижидизилгезинде болгаш өөредилгезинде чаартыкчы аргаларны ажыглап чоруур киржикчилерниң саны немежип турары өөрүнчүг. Киржикчилерге болгаш оларның командаларынга, жюри кежигүннеринге мөөрейниң хүннеринде бедик тура-сорукту күзедим» - деп, Тываның Баштыңы Владислав Ховалыг демдеглээн.

 

Мөөрейниң шенелделери 8 аңгы шөлчүгешке эртер. Ооң школа иштиниң чадазынга 3628 кижи, кожуун чергелиг мөөрейлерге 1346 кижи киришкен, а регионалдыг чадага киржири-биле 246 башкы келгенин сагындыраал.

 

«Бо удаада мөөрейниң киржикчилеринге онзагай чыл болуп турар. 1990 чылда бир дугаар «Чылдың башкызы» деп мөөрейни эрттирген. Киржикчилерде ийи дакпыр харыысалга онаашкан – мөөрей Ада-чурт камгалакчызының чылында база Улуг Тиилелгениң 80 чыл оюнуң бүдүүзүнде 35 дугаар эртип турар. Киржикчи бүрүзү мөөрейниң шенелделерин төлептиг эртип, өөредилге-кижизидилге ажылында эң тергиин арга-дуржулгазын, бодунуң бедик билиг-мергежилин бараалгадырын күзеп тур мен» - деп, өөредилге сайыдының хүлээлгезин күүседип турар Ренат Ооржак бодунуң блогунда дыңнаткан.