Главная
Мөңгүн-Тайга кожууннуң чагыргазының ажылдакчылары биле «Чаш назынның навигаторлары» федералдыг төлевилелдиң муниципалдыг координатору уругларның айыыл чок чоруун хандырарынга хамаарышкан хыналда үнүүшкүннерни чоруткан.
Чайлагларда уругларның айыыл чок чоруун хыналдага алыры-биле үнүүшкүннер өске-даа кожуун-сумуларда чоруттунуп турар. Бо ажыл чай дургузунда үргүлчүлээр.Олар Каргы-Бажы талазында малчын турлагларга чедип, дыштанылгазын чайлагларда эрттирип турар 32 уругну илереткен. Чаштарның хоойлу езугаар төлээлелери-биле уругларның айыыл чок чоруун хандырарының дугайында чугааны кылган: ажыл-ишке, отка, хем-сугга шын алдынарының дүрүмнерин сагындырган. Уруг бүрүзүнге чайгы үеде айыыл чок чорук дугайында таныштырылга-буклеттерни үлээн.
Профилактиктиг беседалардан аңгыда, уругларга спортчу оюннарны организастаан. Хыналда үнүүшкүн үезинде уругнуң айыыл чок чоруун хажыткан дугайында таварылга илереттинмээнин сагындыраал. Ынчалза-даа назы четпээннерниң айыыл чок чоруун хандырар хемчеглер бүдүн чай дургузунда уламчылаар.
«Назы четпээн уруг-дарыгның айыыл чок чоруу чүгле улуг улустан хамааржыр. Ынчангаш уругларның кадыкшылы, амы-тыны дээш харыысалгалыг болуп, бедик кичээнгейлиг болурун ада-иелерге сагындырып тур бис» - деп, «Чаш назынның навигаторлары» федералдыг төлевилелдиң муниципалдыг координатору демдеглээн.