Чаа өөредилге чылының эгелээни-биле, Тываның шупту өөредилге албан черлеринде Айыыл чок чоруктуң айын чарлаан. Ол дугайында республиканың өөредилге сайыдының хүлээлгезин күүседип турар Елена Самбала бодунуң блогунда бижээн.

- Чаа өөредилге чылының эгелээни-биле, Тываның шупту өөредилге албан черлеринде Айыыл чок чоруктуң айын чарлаан. Ооң кол сорулгазы - янзы-бүрү берге таварылгаларда айыыл чок чоруктуң аргаларын уругларга билиндирери. Бо айтырыгга ада-иелер болгаш уругларның хоойлу езугаар төлээлери киржилгелиг болур ужурлуг. Аныяк-өскенниң айыыл чок чоруу олардан чугула хамааржырын утпаалыңар.

Уруглар садтарында болгаш школаларда, ол ышкаш регионнуң техникумнарында янзы-бүрү профилактиктиг хемчеглер чоруттунуп турар - айыыл чок чорукка хамаарыштыр сагындырыглар, ада-ие хуралдары, школа чанының чадаг кижи эртер оруктарынга ада-иелерниң, КАИ ажылдакчыларының киржилгези-биле партрульдаары, айыыл чок чоруктуң интсрукциязын таныштырары, "комендант шагы" дээш оон-даа өске.

Уруглар информацияны дыка эки шиңгээдип алыр. Орукту кежерде, бичии уруг ада-иезинге светофорже айтып, доктаадып турган таварылганы көрдүм. Бичии уругнуң кичээнгейлиг чоруу дыка хөйнү шиитпирлеп турар.

Бистер, ада-иелер, кырган-ава, кырган-ачалар, хоойлу-дүрүм үрээр чорукка удур база озал-ондактыг таварылгаларны болдурбазы-биле, уругларывыс-биле профилактиктиг чугааларны чорудар ужурлуг бис. Кичээнгейлиг болуңар! Бодуңарны болгаш чоок кижилериңерни камнаңар!

Айыыл чок чоруктуң айын сентябрь 26-да республиканың ада-иелери-биле Сферум платформаның бүгү-ниити өөредилгезинге түңнээр - деп, сайыт демдеглээн.