Өөредилге чылының бүдүүзүнде, Тыва школалар автопарыгын чаартыр. Республиканың Өөредилге яамызының 2024 чылдың ноябрьда Россия Федерациязының Чырыдыышкын яамызынче чоруткан чагыы-биле регионда муниципалдыг школаларга дээш «ГАЗ», «УАЗ» база «Форд Транзит» маркалыг 25 автобус келген. 2025 чылдың сентябрь 1-ге чедир чаа машиналарның дүлгүүрлерин байырлыы-биле тыпсыр. Россияның соңгу чүк регионнарының берге оруктарынга таарыштырган школачы транспортту республика алыр.

Сентябрьда республикада элээн каш чаа школалар ажыттынар – олар боттары транспорттуг болур ужурлуг деп, Тываның Баштыңы Владислав Ховалыг бодунуң блогунда дыңнаткан. Кызылдың болгаш Тываның кожууннарының школаларында ажылдаар хуусаазы төнген азы техниктиг байдалы багай машиналарны солуур кылдыр чаа транспорт келген. Тожу, Мөңгүн-Тайга кожууннар дээн ышкаш чедери берге черлерде школалар тура дүшпес шынарлыг автобустар-биле хандыртынган.

Сөөлгү чылдарда республиканың өөредилге черлериниң автопарыгын чаартырынче онза кичээнгей угланганын Владислав Ховалыг демдеглээн. Бөгүнде Тываның өөредилге черлеринде школачылар аргыштырар 284 автобус ажылдап турар – хереглелиниң аайы-биле «ПАЗ», «ГАЗ», «УАЗ» база «Ford Transit» маркалыг автобустарны тус-тузунда аңгылаан. Регионалдыг Өөредилге яамызының чагыы долузу-биле күүсеттинип, эрткен чылын Тываның школаларынга 47, бо чылын 25 автобус келген.

Автопаркты чаартыр программа езугаар эргижирээн машиналарны доктаамал солуп турарындан, регионнуң школаларында транспорт чедишпес деп чүве чок. Россия Федерациязының Президентизиниң деткимчезиниң база «Чаңгыс демниг Россия» партияның школачыларга өөредилгениң чедингирин бедидеринче угланган төлевилелиниң ачызында ол боттанган.

Өөреникчилерни школаже хүн бүрүде аргыштырарынга, школачыларны спортчу- культурлуг хемчеглерже, организастыг дыштанылга черлеринче сөөртүрүнге автобустарны ажыглап турар. Школа автобустарының чолаачылары айыыл чок чорук негелделеринге дүүштүр тускай өөредилгени албан эртер.

Автобустарны тахографтар, дүргенин кызыгаарлаар дериг-херекселдер, медээ бээр херексел, чолаачыны кыйгыртыр базыткыыш, навигация херекселдери дээш, херек чүүлдер-биле четчелээн.