Бүгү-делегейниң кыс чонунуң байырлалының бүдүүзүнде Кызыл хоорайның 9 дугаар гимназиязында 9 «б» класстың өөрникчизи, школаның хөй-ниити ажылдарының активчизи Сүктер-Шимет Ондар солун концертти ынак башкыларынга, херээжен чонга тураскааткан.

 

«Дыка солун концертти көрдүвүс. Идепкейжи өөреникчивис Сүктер-Шиметтиң чараш ырларын магадап дыңнадывыс. Ол ышкаш школаның эр башкылары, оолдар база Немелде өөредилге төвүнүң чогаадыкчы каттыжыышкыннарының өөреникчилери уран талантызын бараалгаткан. Адыш часкаашкыннары диңмиреп турду. Школаның администрациязы Сүктер-Шиметтиң авазынга Март 8 байырлалы-биле база оглунуң үлегерлиг кижизидилгези дээш боодал чечектерни тудускан.

Байырланчыг байдалды тургусканы дээш Немелде өөредилге төвүнүң педагогтарынга, вокалдың удуртукчу башкызы Светлана Михайловнага өөрүп мөгейдивис» - деп, тыва дыл болгаш чогаал башкызы Сара Донгаковна Санчы демдеглээн.