Тес-Хем кожуунунуң Шуурмак школазының 8-ки клазының өөреникчизи Сандак Чимис төрээн дылынга ынак, шүлүк өөрениринге болгаш сайгарарынга сонуургалдыг. Ол Тываның күрүне университединиң эртем-практиктиг конференциязынга «Бады-Байыр Тараачының «Кара тюльпан» деп шүлүүнүң онзагайы» деп шинчилел ажылы-биле киришкеш, бирги черни элээн. Чимистиң эртем талазы-биле удуртукчузу Сенди-Айыыжы Дегелдеевна Луду, тыва дыл болгаш чогаал башкызы. Башкы Чимис-биле шүлүктерни сайгарып, библиотекаларга кады ажылдап, эртем ажылы деп чүл, шүлүктү канчаар сайгарар болза эки деп чүүлдерге эге базымнарны берген.

«Төрээн черимниң чогаалчызы Бады-Байыр Тараачының чогаалдарын ам-даа өөренип шинчилээр мен» - деп Чимис Сандак чугалаан. Ол Бады-Байыр Тараачы, Моторк Тирчин, Александр Даржай, Степан Сарыг-оол болгаш өске-даа чогаалчыларның ажылдарын сонуургап шинчилеп турар. Аныяк эртемден ам-даа эртем-практиктиг конференцияларга болгаш конкурстарга киржип, бодунуң чаа шинчилел ажылдарын бараалгадып, көргүзер бодалдыг.

Сандак Чимис: «Келир үеде эмчи болур күзелдиг мен. Чогаал бижиирин база бодап чоруур мен, чүге дизе чогаалчы Бады-Байыр Тараачы эмчи болгаш чогаалчы чораан. Ол ышкаш ынчаар ажылдаарынга таарзынып тур мен».
#ирнш #минобрнаукирт #тыва #годнаукиитехнологий