Борбак-оол Иргитович Араптан 1938 чылдың март 1-де Көп-Сөөк сумузунуң Хөлегелиг-Өдек деп черинге төрүттүнген. 1955 чылда Кызылдың № 2 школазын дооскан. Кызылдың башкы институдун (Кызылский учительский институт) доозупкаш, 1957 чылдан эгелеп, башкы ажыл-чорудулгазын Бай-Тал школазынга тыва дыл болгаш чогаал башкызы болуп эгелээн.

А 1959 чылда Тээлиниң чеди чыл школазынга ажылдай берген. Ооң соонда Кызылдың күрүнениң башкы институдунче кирип алгаш, чергелештир Ээрбектиң чеди чыл школазынга директорнуң өөредилге талазы-биле оралакчызы кылдыр ажылдаан.

Республиканың школаларынга ажылдаар башкыларның чедишпези-биле, эки студентилерни хаара тудуп турган.

1960 чылда Калининград хоорайның чоогунга Кызыл Шериг хүрээлеңинге шериг албанын эрттирери-биле чорупкан. Ол үеде дивизияның партия школазынга өөренип турган. Чанып келирде, офицер дужаалдыг чедип келген.

Шериг соонда Кызылдың башкы институдун экстерн-биле доозуп, Ээрбек школазынче дедир чедип келгеш, директор апарган. 1969 чылда өг-бүлези-биле Туранче көжүп, Туранның № 2 школазын удурткан.

1975 чылдан 1978 чылга чедир Тес-Хем кожууннуң районнуң өөредилге килдизин эргелеп турган. А 1978 чылдан эгелээш, 30 чылдың дургузунда Сукпак ортумак школазын халаг чок директорлаан.

Борбак-оол Иргитович Туран хоорай биле Сукпак суурга чурттап тургаш, хоорай болгаш көдээ Советтиң шупту чыыштарының депутады турган.

Амгы үеде Сукпак ортумак школазы Борбак-оол Иргитович Араптанның адын эдилеп турар. Ол хүндүлүг дыштанылга-даа болза, тыва дыл болгаш чогаал кичээлдерин эрттирип турар.

Хүндүлүг хоочун башкывыс Борбак-оол Иргитовичиге Башкы хүнү-биле байыр чедирип, чаагай күзээшкиннерни сеткилдиң ханызындан күзедивис. Кадыкшылды, аас-кежикти болгаш буян-кежикти сөңнедивис. Байырлал-биле!