Ноябрь 26-да Россияның улустарының найырал университединиң Бүгү-делегейниң Азия, Африка болгаш Латин Американың чурттарының шинчилел институдунуң директорунуң оралакчызы Надежда Сергеевна Кучма-биле ужуражылгага Тываның эртем төвүнүң эртем ажылдакчызы, ниити эртемнер лабораториязының эргелекчизи Анай-Хаак Базырчап база организастыг айтырыглар талазы-биле директорнуң оралакчызы Сергей Хүлер киришкен.

Ужуражылга Тыва Республиканың Алдан-Маадыр аттыг Национал музейниң «Алдын Дошка» стеларийинге болуп эрткен. Ук хемчег Эртем болгаш технологиялар чылынга тураскаадып эртип турар.

Надежда Кучманың Тываже чедип келгениниң сорулгазы – тус черниң эртем ниитилели-биле база «Россияда буддизм» мергежилин бедидер программаны хөгжүдер айтырыгларның талазы-биле буддологтар-биле ужуражылга. Ук программада бо чылын «Тыва Республиканың Камбы-Лама эргелели» Төпчүткен буддисчи шажын организациязының төлээлери киришкен.

«Россияда буддизм» мергежилин бедидер программа дыңнакчыларга Россияда болгаш делегейде буддизмни янзы-бүрү школаларга организастаарын, практика, теория, төөгү адырының угланыышкынының, а ол ышкаш күрүнениң буддисчи ажыл-чорудулгазын башкарар база Россияда өске-даа шажынчы организациялар, күрүнениң болгаш Россияда буддисчи общиналарның удур-дедир харылзаазының хевирлериниң айтырыгларының талазы-биле медээлээриниң деңнелин бедидеринче угланган.
Тываның эртем төвүнүң ажылдакчылары ужуражылганың түңнелинде эки болгаш сагыш-сеткилге аянныг кылдыр артып калган дээрзин демдеглеп, Надежда Кучмага база ооң байлак мергежилдиг дуржулгазынга онза сонуургалын база илереткен.

#ГодНаукиТехнологийТыва #минобразованиярт