Школа назыны четпээн өөредилгениң Федералдыг күрүнениң өөредилге стандартызын (ФГОС) кииргени-биле өскерилгелер болуп турар. Уруглар садтарында орус болгаш тыва дылдарны деңге сайзырадып хөгжүдери-биле Институт развития национальной школы ажылдакчылары 2019 чылдан тура, Кызылдың 31 дугаар уруглар садының баазазынга уругларга ийи дылды деңге өөредири-биле башкы шинчилелин эрттирген. Уруглар ийи дылга чугааланып тургаш, бир дылдан өске дылче дүргени-биле шилчиир апаар, а ооң уржуунда оларның сагынгыр, угаангыры, логиказы сайзыраар.

Школа назыны четпээн уругларга тыва дылды хөгжүдери-биле чаңгыс аай өөредилгени тургузар сорулгалыг Тываның Өөредилге яамызының Национал школа хөгжүдер институт уруглар садтарынга тыва дылды билир болгаш билбес уругларга өөредири-биле «Тыва дыл – чаштарга» деп регионалдыг төлевилел Күрүне программазында кирген болгаш Тыва Республиканың школа назыны четпээн уруглар өөредир албан черлеринге уругларның төрээн (тыва) чугаазын сайзырадырының «Төрээн Тывам» («Моя родная Тува») деп чижек өөредилге программаларын ажылдап кылган. Шак бо өөредилге программазы шуут чаа, ооң мурнунда турбаан дээрзин демдеглеп турар.

Тыва дылды уруглар садтарында өөредип эгелээнден бээр барык 2 чыл ажып турар. Бо хүннерде Национал школа хөгжүдер институттуң директору, тыва дыл талазы-биле инспектору, ф.э.к. Сайзана Товуу Кызыл хоорайның уруглар садтарында «Тыва дыл – чаштарга» деп төлевилелдиң боттанылгазы кайы хире чоруттунуп турарын хынап көрген.
«Хоорайның уруглар садтарында тыва дыл кабинеттериниң дерилгезиниң онза чаражын, уругларга тыва дылды өөредиринге таарымчалыг байдалды тургусканы бедик деңнелде деп чүүлдү көрдүм.

Тыва дылды ажы-төл бичии чажындан тура, өөренип шиңгээдип алыры чугула, чүге дизе дыл хөгжүлдези уругларның угаан сайзыралынга улуг рольду ойнап турар. Бо ажыл талазы-биле башкылар чогуур ажыл-чорудулганы чорудуп турары өөрүнчүг» – деп, Сайзана Товуу демдеглээн.

#минобрнаукитыва #ирнш #развитиетувинскогоязыка #тывадылдетям #госпрограмматувы #годнауки