Национал школа хөгжүдер институтка үрде манаанывыс онзагай болуушкун болган – «Школа назыны четпээн уруглар өөредир албан черлеринде тергиин тыва дыл кабинеди» деп мөөрейниң тиилекчилери кол шаңналдар кылдыр дериг-херекселдерни: интерактивтиг самбыраны, ноутбуктарны, принтерлерни, телевизорларны база хөгжүм-аялга төптерин белекке алган.

2020 чылдың ноябрь айда Тыва Республиканың Өөредилге болгаш эртем яамызы «Школа назыны четпээн уруглар өөредир албан черлеринде тергиин тыва дыл кабинеди» деп мөөрейни чарлаан. Мөөрейниң тиилекчилери болгаш дипломантылары тыва дыл кабинеттеринге интерактивтиг дериг-херекселдер садып алыры-биле 120 000 рубль түңнүг сертификаттарны шаңналга алганнар: Чөөн-Хемчик кожууннуң «Хээлер» уруглар сады, Каа-Хем кожууннуң Сарыг-Сеп суурнуң № 5 «Родничок» уруглар сады, Кызыл хоорайның № 31 уруглар сады.

«Тергиин тыва дыл кабинеди» номинацияга Ак-Довурак хоорайның «Сказка» аттыг уруглар сады төлептиг болуп, 250 000 акшага интерактивтиг дериг-херекселди садып алыр сертификат-биле шаңнаткан.

Оон аңгыда, өске уруглар садтарынче дериг-херекселдерниң хандырылгазы уламчылаар – тиилекчилер болгаш шаңналдыг черлерниң эдилекчилери чоокку үеде белектерин алыр. Уруглар садтарының материал-техниктиг баазазын экижидеринге мындыг шиитпирлиг базымнар Тыва Республиканың «2021-2024 чылдарда күрүне дылдарының сайзыралы» деп Күрүне программазының боттандырылгазы-биле күүсеттинип турар.

Уруглар садтарының өөредилге ажылынга улуг чедиишкиннерни күзедивис! Аас-кежиктиг, кадык болуңар!

#ирнш #лучшийкабинеттувинскогоязыка #тывадылдетям #госпрограмматыва