Чаа чылдың бүдүүзүнде өөрүнчүг медээлер болгаш болуушкуннар удаа-дараа болуру чаагай чаңчыл. Тываның Өөредилге яамызынга 2021 чылдың дургузунда башкы ажыл-чорудулгазының үре-түңнелдиг көргүзүглери-биле республиканың шылгараан башкыларының бирээзи ТР-ниң Аграрлыг лицей-интернадының башкызы Любовь Карымага өөредилге сайыдының бирги оралакчызының хүлээлгезин күүседип турар Ирина Сарагашева сайыттың мурнундан Чаа чылдың белээн тывыскан.

Любовь Сорадаковна аграрлыг лицей-интернаттың өөреникчилеринге математика эртеминиң делегейиниң билиин өөредип турар. Ооң ажылының түңнелдери - өөреникчилериниң регионалдыг база Россия чергелиг олимпиадаларның болгаш фестивальдарының хөй санныг дипломнары болгаш медальдары.

«Чаа чыл бүдүүзүнде белек алыры канчаар-даа улуг өөрүшкү болгаш аас-кежик деп санаар мен. Мээң башкы ажылымны бо мынчаар бедик үнелеп турары - меңээ дыка өөрүнчүг. Ол кижиниң хей-аъдын көдүрүп, улуг деткимчени көргүзүп турар. Шак бо үнелел меңээ моон-даа соңгаар эки түңнелдерже дыка улуг идигни берип, өзүп орар салгалывыска быжыг эртем-билигни бээри - кол сорулга деп санаар мен. Өөредилге яамызынга өөрүп четтиргеним сеткилим ханызындан илередир-дир мен» - деп, Любовь Карыма үлешкен.

#минобразованиятыва #премияпрезидента