Деспи, тос-карак, тыва тон, кандааза, ... Шак мындыг чараш кылган ажылдарны Барыын-Хемчик кожууннуң Уран чүүл төвүнге Шагаа байырлалынга тураскааткан хемчегде делгээн. Ол Уран чүүл төвүнүң немелде өөредилгезинче барып турар уругларның болгаш башкыларның чогаадыкчы ажылдарының делгелгези.

Шагаа дүжер мурнунда Бүдүү ай үнер. Бүдүү айда байырлыг хемчеглер чер-черлерге янзы-бүрү темаларлыг болуп эгелээн. Шагаа – тыва чоннуң ыдык чараш байырлалы. Ол дээрге ай санаашкыны-биле частың башкы айының үнүп келгени болур. Чараш байырлал өзүп орар салгалга кижизидилге угланыышкыны-биле база бурун өгбелеривистен дамчып келген чараш езу-чаңчылдарны кадагалап арттырып, дамчыдып бээри-биле улуг дузалыг дээрзи чугаажок.

Даараан, аргаан, чазаан онза чараш ажылдар, саазын-биле кылыглар, чонар-даштан болгаш чураан ажылдар делгелгеде хөй болган. Ажыл бүрүзү бир онза, тускай, бир-ле аңгы шынарлыг, сагыш-сеткилинден кылган деп көскү.

«Бо чылын өөреникчилерниң болгаш башкыларның делгелгези сагыш-сеткилге дыка эки кылдыр арткан. Ажылдарның хөй болганы, онза чаражы база кылган шынары бедик деңнелдиг болуп шылгараан. Уругларның бүгү тала-биле сайзыралынга, шынап-ла, немелде өөредилге улуг рольду ойнап турар», – деп, жюри кежигүннери болгаш хемчегниң эрттирикчилери онзалап демдеглээн.

#миннобразованиятыва #шагаа2022 #шагаабиле #допобразованиятыва