Кышкы үеде уруглар хостуг үезин доштан кылган чуңгуларга база чуңгулаар тейжигештерге ойнап чуңгулаарынга ынак. Кышкы оюннар үезинде айыыл чок чорукту сагыыры эргежок чугула.

Республиканың немелде өөредилге төвүнүң каттышкан айыыл чок чоруктуң килдизиниң специалистери дош чуңгуларга база чуңгулаар тейжигештерге айыыл чок чоруктуң инструкцияларын эрттирип турган.

Уругларның кышкы дыштанылгалары болуп турза-даа, төптүң ажылдакчылары школачылар-биле ужуражып, айыыл чок чорук дугайында сагындырып, чугааларны чорудуп турган. Беседалар үезинде школачыларга шанактарга база тускай чуңгулаар херекселдерге чуңгулап ойнаар дээн болза, чүгле тускайлап аңгылаан черлерге болур дугайында тайылбырны чоруткан.

Автотранспорт болгаш өске-даа объектилер база тудуглар чанынга кемдээшкиннер ап болур хире черлерге чуңгулап болбас дээрзин сагындырып турган. Айыыл чок чорук дугайында чогуур медээлерлиг буклеттерни болгаш удуртулгаларны уругларга үлеп, дыштанылгаларын хөглүг болгаш айыыл чок кылдыр эрттирерин чагып, күзеп турганнар.

Төптүң специалистериниң демдеглеп турары-биле алырга, уруглар-биле чырыдыышкын беседаларын үргүлчү эрттирип турарга, уругларга боттарынга солун-даа, ажыктыг-даа, чүге дизе үе-черге чажыт эштеринден медээни билип алырга, чедингир болгаш билдингир болур. Ынчангаш олар айыыл чок чорукка хамаарыштыр айтырыгларга кичээнгейлиг болур.

#минобразованиятыва #безопасностьдетей