Тываның политехниктиг техникумунга студентилер-биле «Сүбедей» патриотчу клувунуң дайынчы чорук хоочуннарының кежигүннериниң чаңчыл болган ужуражылгазы болуп эрткен. Ужуражылга «Эр сорук неделязы» деп хемчегниң иштинде афган дайынының киржикчилериниң, солдаттарның база офицерлерниң маадырлыг чоруктарының дугайында төөгүлүг сактыышкыннарны арттырар сорулгалыг, а ол ышкаш Чуртунга ынак база патриотчу соруктуг аныяк салгалды кижизидеринче угландырып эрттирген.

Студентилер улуг сонуургал-биле афган дайынчыларының чугааларын дыңнап, сонуургаан айтырыгларын салган. Афганчылар албан-хүлээлгезиниң дугайында, ада-иезинге чагааларының база чанып чедип келгениниң дугайында сонуургаткан. Студентилерниң айтырыгларынга ужуражылганың хүндүлүг аалчылары Тываның Десантниктер эвилелиниң база Афганистанның хоочуннар эвилелиниң кежигүннери харыылаан. Хемчегниң киржикчилери Тиилелге шөлүнде Мемориалдыг комплекске веноктар салыр езулалга база киришкен.

Техникумнуң башкылары хоочун афганчыларның аныяктарга оларның патриотчу-хамааты кижизидилгезинге киирип турар улуг салыышкынын демдеглээн.

«Эр сорук неделязы» республиканың шупту техникумнарында болгаш колледжеринде эртип турар. Шак ынчалдыр, Тываның тудуг техникумунуң Шагонарда филиалынга Афган дайынының болгаш ооң маадырларының база дайынга амы-тынын берген маадырларның дугайында сактыышкын кылдыр «Сөөлгү солдат» («Последний солдат») деп документалыг кинону бараалгаткан.

Февраль 16-дан эгелеп, Тываның ортумак профессионал өөредилге албан черлеринде «Эр сорук неделязы» чоруп турарын сагындыраалыңар. Ук хемчег Ада-чурт камгалакчызының хүнү болгаш Афганистандан совет дайынчы шеригни үндүргенинден бээр 33 дугаар чылын таварыштыр эрттирип т урар. Аңаа тураскаадып, эрес-дидим чорук кичээлдерин эрттирип, документалдыг болгаш уран чүүл киноларның көрүлдезин, класс шактарын, шүлүктер мөөрейлерин база элээди оолдар аразынга армрестлинг маргылдаазын организастап турар.

«Эр сорук неделязы» 2022 чылдың февраль 23-ке чедир болур.

#минобразованиятыва #неделямужества #спо_рт #воспитание_в_спо #23февраля