Тыва культура төвүнге кадыының байдалы-биле кызыгаарлыг улус аразынга «Мен болгаш мээң ада-чуртум» деп чогаадыкчы мөөрей болуп эрткен. Ук хемчегни «Күзел» коммерциялыг эвес автономнуг организация (КАО) Россия Федерациязының Президентизиниң Культурлуг эгелекчи саналының фондузунуң саң-хөө деткимчези-биле организастаан.

«Күзел» КАО-нуң даргазы Буян Ооржак: «Мөөрейни кадыының байдалы-биле кызыгаарлыг улустуң чогаадыкчы сайзыралынга таарымчалыг культурлуг хүрээлеңни тургузарының эргежок чугула айтырыынга хөй-ниитиниң кичээнгейин хаара тудар сорулга-биле эрттирип турар».

Мөөрейге ниитизи-биле 11 кижи киришкен. Жюриниң тургузуунда ТР-ниң культуразының алдарлыг ажылдакчызы, ТР-ниң культуразының тергиини, Кызылдың Хөй-ниити хемчеглериниң төвүнүң директору Валентина Монгуш, Тываның Күш-ажыл болгаш социал политика яамызының специализи Раля Кама, а ол ышкаш республиканың «Поддержка» төвүнүң кол специализи Аржаана Иргит.

Мөөрей хүнүнде көрүкчүлер болгаш жюри чогаадылганың шупту жанрларын бараалгаткан номерлерин көрген. Жюри кежигүннеринге нарын дээн сорулга тургустунган – эң-не экини шилиири.

Тываның информастыг технологиялар техникумунуң 3-кү курузунуң инклюзивтиг салбырының «Программирование в компьютерных системах» деп мергежилдиң студентизи Аганак Седип салым-чаяан мөөрейинге бодунуң күжүн болгаш чаа сеткил-сагыш хайныышкыннарын алыры-биле киришкен. Аныяк оол ук чогаадыкчы мөөрейге 3-кү черни алган.

«Мен ырлаарынга ынак мен, доктаамал ырлап чоруур мен. Ооң мурнунда мен бо ышкаш мөөрейлерге база киржип турган мен. Бо удаада мен Аян Ооржактың «Тывам» деп ырыны күүсеттим. Эгезинде девидеп сүрээдеп турдум, оон бодумну туттунуп оожургаткаш, чедиишкинниг үндүм. Белеткелим хилис барбаан» – деп, Аганак Седип сценаже үнери солун дээрзин демдеглеп, чогаадыкчы чоруун улаштырар дугайында чугаалаан.
Студентиге байыр чедирип, чогаадыкчы чедиишкиннерни күзедивис!

#минобразованиятыва #яимоетворчество