Тываның политехниктиг техникумунуң баазазында Республиканың хүлээп алыышкын комиссиязының ажыл-чорудулгазы ам-даа уламчылап турар. Ортумак болгаш дээди өөредилге албан черлеринче өөренип кирери-биле абитуриентилерниң документилерин 2022 чылдың июнь 20-ден эгелээш, июль 20-ге чедир хүлээр дээрзин сагындыраалыңар.

Абитуриентилерниң документилерин дараазында адресте хүлээп турар: Кызыл хоорай, Салчак Тока кудумчузу, бажың 14 (кол корпус). Хүлээп алыышкын комиссиязының бөлүүнде республиканың яамыларының болгаш албан черлериниң специалистери ажылдап турар.

Тываның Өөредилге яамызында абитуриентилерге болгаш оларның ада-иезинге (хоойлу езугаар төлээлеринге) Россия Федерациязының болгаш Тыва Республиканың ортумак болгаш дээди өөредилге албан черлеринче кирериниң, ол ышкаш тускай сорулгалыг керээ-биле кирер талазы-биле айтырыгларга хамаарыштыр”изиг шугум” ажылдап турар. Айтырыгларны дараазында дугаарже долгап, айтырып болур: 8(39422) 6-11-45.

Хүлээп алыышкын комиссиязының ажылында үнүүшкүннүг комиссиялар база киржип турар. Оларга Бурятияның күрүнениң көдээ ажыл-агый академиязы, Бурятияның күрүне университеди (Улан-Уде), Кузбасстың күрүнениң көдээ ажыл-агый академиязы (Кемерово), Алтайның күрүнениң университеди (Барнаул) база Сибирьниң күрүнениң эртем болгаш технология университеди (Красноярск) хамааржыр. Өөренип кирип алыр күзелдиг абитуриентилер ук өөредилге албан черлерин шилип, документилерин дужаап болур. Ол ышкаш ук үнүүшкүннүг комиссияларның специалистери өөредилге албан черлеринче кирериниң шупту хевирлериниң дугайында консультацияларны берип, тайылбыр ажылын кылып турар.

Республиканың хүлээп алыышкын комиссиязы кожууннарже үнүүшкүннерни кылып, шенелде комиссия ажылын кылган. Шак ынчалдыр, үнүүшкүннүг хүлээп алыышкын комиссиязының специалистери Эрзин биле Тес-Хем кожууннарынче ажылчын сургакчылаашкынны кылып, тус черлерниң абитуриентилериниң документилерин хүлээп алган. Ук үнүүшкүннүг хүлээп алыышкын комиссиязы кожууннарже үнерин уламчылаар.

#минобразованиятыва #приемнаякомиссия