Башкы ниитилелиниң төлээлериниң аразында “Башкы” деп мергежил тергиидеп, салгалдан салгалче дамчып турар өг-бүлелер эвээш эвес.

Тываның Өөредилге яамызының эгелээни Өг-бүле, ынакшыл болгаш шынчы чорук хүнүнге тураскааткан рубриказында башкы өг-бүлелерни таныштырып турар.

Таныжыңар – Кызыл хоорайның М.А. Бухтуев аттыг № 1 ортумак школазының башкылары Айгор биле Белекмаа Көшкендейлерниң эп-найыралдыг, быжыг өг-бүлези.

Көшкендейлерниң өг-бүлезиниң ниити үзел-бодалы-биле алырга, өг-бүле дээрге эң-не эргим чүүл. Ол чокка амыдыраары болдунмас, азы болза, ол чокка чурттаарынга, ажылдаарынга база ынакшыырынга шуут-ла “таарымча чок байдал”.

Айгор биле Белекмаа Көшкендейлер: “Өг-бүле дээрге чүгле аас-кежик эвес. Ол, чүнүң-даа мурнунда, улуг күш-ажыл база улуг харыысалга болбайн канчаар. Өг-бүлелерде ажы-төл, хөй нуруузунда, бот-боттарынче көрүп, деңнежип, үлегерин эдерер. Хүндүлээчел болурунга өөренир, улуглары бичиилери-биле кичээлдээр болгаш, чоок кижилериниң дугайында кичээнгейлиг болгаш сагыш човаашкыны-биле ылгалып турарлар.

Ада-ие болуру нарын-берге болгаш харыысалгалыг. Ажы-төлдү кижизидери дээрге, чүгле эртенден кежээге чедир “угаанныг” сургаал кылыры эвес. Кезээде болгаш каяа-даа үлегер болур ужурлуг. А ол ындыг амыр эвес! Ынчангаш ажы-төлүңерге боттарының ада-иези-биле чоргаарланыр кылдыр арганы бериңер. База лл – эң-не эки кижизидилге болур! А ажы-төл шупту каң кадык болуп өссүннер, ол ышкаш боттарының чедиишкиннери-биле Силерни өөртүп чорзуннар!”.

#минобразованиятыва #деньсемьилюбвиверности