«Школа системазының өөредилгезиниң чаартылгазы» деп федералдыг программа – ниити билиг организацияларының черлерин өөредилге болгаш кижизидилге херекселдери-биле хандырарының база капитал септелге талазы-биле төлевилел дээрзин сагындыраалыңар. Бо чылын Тываның 27 школазы төлевилелже кирген.

Школаларны чаартырындан база чаа дериг-херекселдер садарындан аңгыда, Россия Федерациязының Чырыдыышкын яамызы школаларның удуртукчуларынга школа иштинде хостуг черлерни ажыктыы-биле ажыглаарын саналдаан. Чижээлээрге, школа музейлерин, театрларын, спортчу клубтарын тургузары, а ол ышкаш Россия Федерациязының тугун, сүлде демдээн база өске демдектерин уругларның кижизидилгезинге болгаш өөредилгезинге ажыглаары.

Капитал септелгези доосту берген Самагалдайның № 2 школазының баазазынга Уругларның бот-идепкейиниң төвүн ажыдарының чорудуунуң дугайында ооң директору Азияна Намзырай чугаалаан: «Бис баштайгы ажылды чорудуп, школада төптүң турар черин тодараткан бис. Ол дээрге янзы-бүрү бичии уругларның РДШ, Юнармия, ЮИД, МЧС, школаның арга-арыг бөлүү, ортумак класстарның бот-башкарылгазы дээн ышкаш хөй-ниити каттыжыышкыннарын болгаш шимчээшкиннерин хаара тударонзагай төп болур. Ук өрээл уруглар аңаа келгеш, боттарын таарымчалыг, сагыжынга тааржыр, безин боттарын ооң ээлери кылдыр санаар ужурлуг, чүге дизе ону «уругларның бот-идепкейиниң өрээли» деп адаар болгай».

Ниитизи-биле алырга, ук өрээлди хуралдар эрттиреринге, чижээ, Большая перемена деп федералдыг төлевилелдиң хемчеглерин боттандырарынга ажыглаар. Аңаа класс шактары болгаш «Разговоры о важном» төлевилелдиң боттанылгазы чоруттунар.

Тываның школаларында капитал септелге уламчылап, ажылы доостур кезээнде. Төптерни тургузарының талазы-биле ажылдарны доозарын август айның төнчүзүнде, чаа өөредилге чылының эгезинде планнап турар.