Тывага «Демография» национал төлевилелдиң «Ажылга хаара тударының деткимчези» («Содействие занятости») федералдыг төлевилелдиң боттандырылгазының шынарын хынаары-биле Worldskills Russia Академиязының директору Светлана Крайчинская биле Тывада төлевилелдиң куратору Елена Дугина олар кээп чораан.

Ийи хүн дургузунда эксперттер Worldskills шимчээшкининиң 8 өөредилге шөлчүгежиниң ажылын хынаан. Чылдың-на кээп турар сургакчылаашкынның сорулгазы – доозукчуларның ажылга кирип алырын болгаш өөредилгениң шынарын хынаары.

«Ниитизи-биле бис ажылды эки деп үнелеп тур бис, көргүзүглер эки-дир – регион ажыл чок хамаатыларын өөредир талазы-биле кезек квотазын болгаш ооң мурнунда тургустунган бодунуң бир дугаар квотазын күүсеткен. Ынчангаш регион квотазын улгаттырарын планнап турар, чүге дизе өөренир күзелдиг улустуң чагыглары бар» - деп, эксперттер демдеглээн.

Ол ышкаш Светлана Брониславовнаның демдеглеп турары-биле, улус чаа ажыл-ишти регионда күш-ажыл рыногунда хереглелден көрүп тургаш, шиңгээдип алыр ужурлуг.

2021 чылдан тура, республикада «Ажылга хаара тударының деткимчези» деп төлевилелдиң иштинде 8 өөредилге шөлчүгештери ажылдап турар. Ында тракторист, маляр, штукатур, повар, каңнакчы болгаш оон-даа өске ажылчын мергежилдерни 300 ажыг кижи шиңгээдип алган дээрзин сагындыраалыңар.

Чурукту архивтен алган.