Ноябрь 1 – чаагай чаңчыл болу берген Тыва дыл хүнү. Чоргааранчыг чараш тыва дылывысты кадагалап арттырар сорулгалыг чылдың-на демдеглеп турар онза байырлалды каш удаа чыл дургузунда, 2016 чылдан тура, эрттирип турар. Бо чылын база чаңчылчаан чараш байырланчыг хүнде Чадаана хоорайның «Хээлер» уруглар «садынга «Тыва тоолдарны уругларның кижизидилге ажылынга болгаш кичээлдерге видео-көргүзүг белеткээри база ажыглаары» деп семинар болуп эрткен.

Хемчегни семинар-таныштырылга хевирге организастаан. Аңаа башкылар тыва тоолдарны пластилин болгаш чуруктарның дузазы-биле өңгүр, чараш кылдыр видео-көргүзүг кылдыр бараалгаткан. Белеткеп кылган тоолдарда маадырларны үннелдиреринге уруглар садының чаштарын хаара туткан. Бичии уругларның тоолдарда үннери дыка чаптанчыг болгаш онзагай болганын киржикчилер демдеглээн.

Семинар-таныштырылганың киржикчилери Тыва дыл хүнүнге тураскаадып эрттирген хемчегни улуг сонуургал-биле көрүп, эки үнелелди берген. Өгбелеривистиң салгалдан салгалче кадагалап арттырып, дамчыдып берген төрээн тыва дылывысты үнелеп, ону камгалап, өзүп орар салгалга дамчыдары чугула. Ынчангаш бичии чаштар уруглар садындан эгелээш, тыва дылды солун тоолдар, чуруктардан өөренири күзенчиг. База ол ышкаш кижизидилге угланыышкынынга ук ажыл кол черни ээлээр дээрзинге чигзиниг турбас.

#минобразованиятыва #тывадыл