Тываның политехниктиг техникумунуң сургуулдарынга, башкыларынга база ажылдакчыларынга бир уттундурбас солун ужуражылга болуп эрткен.

Ужуражылганың хүндүлүг аалчылары дээрге Тываның ховар чараш салым-чаяанныг, аңгы-аңгы адырларның ажыл-ишчилери, «Бодуңга бүзүре!» деп төлевилелдиң боттандырыкчылары, удуртукчулары: Ховалыг Айлана Чечей-ооловна - офтальмолог эмчи, хөй-ниити ажыл-ишчи төлевилелдиң удуртукчузу, Тюлюш Оксана Владимировна - композитор, «Саяны» аттыг Тываның хөгжүм болгаш танцы театрының уран чүүл удуртукчузу, Папын Маргарита Ондаровна - хүндүлүг башкы, Черби суурнуң школа-интернадының удуртукчузу, Чурук Шой Улзайович - сураглыг чурукчу, Тыва Республиканың уран чүүлүнүң алдарлыг ажылдакчызы, Монгуш Белекмаа Аркадьевна - Тываның Чазааның төлээзи, Санаа Артас Валентинович - хостуг хүреш мөгези, Олимпий оюннарының хүлер медалының эдилекчизи, Хомушку Субудай Альбертович - делегей чергелиг балет артизи, «Кремльдиң баледи» деп труппаның солизи, Хомушку Мерген Ким-оолович - Тываның Национал театрының актеру, Тыва Республиканың алдарлыг артизи, Монгуш Дмитрий Александрович - аныяк хөй-ниитичи, Чимис-Донгак Лопсан Мундукай - ыраажы, сыгыт, хөөмей, каргыраа күүседикчизи.

Ужуражылганы техникумнуң «Сылдыстар хоорайы» аттыг уран чүүл төвүнүң киржикчилери чараш театржыткан мода көргүзүү-биле ажыткан. Сургуулдар-биле ужуражып келген аалчылар кижи бүрүзү бодунуң чуртталгазында эрткен оруун төөгүп, амыдыралынга таварышкан моондактарны ажып эртип, кандыг-даа бергелерге торулбайн, тура дүшпейн, чүгле бурунгаар дээш сорукту салып, амыдырап-чурттап чоруурун сонуургадып, бо хуүнде чедиишкиннери-биле үлешкен.

Аалчылар чүгле чугаа эвес, а сургуулдар-биле сырый харыылзааны тудуп, айтырыгларны салып, солун чугааны кылган. Сургуулдар аалчы бүрүзүнүң төөгүзүн, чагыг-сүмезин сонуургал-биле дыңнаан.

Келген хүндүлүг аалчылар боттарының уран-талантызын бараалгатканнар. Ыраажы Лопсан Мундукайның гитарага ырыларын, хөөмей-каргыраазын сургуулдар болгаш башкылар улуг сонуургал-биле дыңнап, диңмиттиг адыш часкаашкыннары-биле хүлээп алган. Хомушку Субудайның күүселдезинде балетти онза сонуургаан. Ол ышкаш Оксана Тюлюштүң синтезаторга уян чараш аялгазы тааланчыг болган.

Аалчылар сургуулдарга белектерни тыпсып, оюннарга идепкейлиг киришкен оолдар, уругларга «Найырал» кинотеатрынга кино көөр билеттер, ресторан баар сертификаттар, суй белектер - суг ижер савалар, волейбол, футбол ойнаар бөмбүктер, шыдыраа, шашки дээш база амданныг торт-биле шаңнаан.

Техникумга «Бодуңга бүзүре» деп төлевилелдиң мурнундан көрүнчүктү белекке берген. Ол ышкаш Тыва Республиканың Чазааның мурнундан техникумнуң башкыларынга болгаш ажылчыннарынга өөрүп четтириишкин бижиктерин тывыскан.
Ужуражылганың төнчүзүнде сургуулдар боттарынга ажыктыг кандыг чүүлдер билип алганын чугаалап, аалчыларга четтиргенин илереткен. Техникумнун удуртукчузу Арган-оол Айдын келген аалчыларга техникумнуң сургуулдарының, башкыларының мурнундан хүндүлел бижиктерни, белектерни сөңнээн.
«Бодуңга бузуре!» деп төлевилелдиң эрттирген ужуражылгазы аныяк-чалыы салгалга келир үезинге улуг бүзүрелди, ынанышты оттурган деп бүзүреп тур бис. Төлевилелдиң удуртукчуларынга база киржикчилеринге сайзыралды, чедиишкиннерни күзедивис!

#минобразованиятыва #спо_рт #тпт