Национал байырлал Шагаа бүдүүзүнде Тываның кадеттер корпузунуң кижизиттирикчилеринге тыва далганның ажыктыг шынарының дугайында чугаалап, база оон национал чем кылыры-биле мастер-классты көргүскен.

Эмчилерниң санап турары-биле, чарбалай тырткан тараадан тыва далган хан-дамыр, хан, ижин-шөйүндү, чүстер болгаш кеш аарыгларын болдурбазынга ажыктыг. Тыва далганның чаңчылчаан аргазы – арбай биле ак-тарааны хооргаш, хоюг чүүл кылдыр дээрбелээш, дустуг тыва сүттүг шайга азы анаа сүтке холааш, өреме биле саржагны амдан киир холуур. Улам чаагай амдан киирер деп бодаар болза, кат-чимис кезектерин, медту болгаш оон-даа өске чигирсиг чүүлдерни холуп болур.

Уругларга мастер-классты Тываның Кадык камгалал яамызының штаттан дашкаар диетологу Анджела Канчыыр-оол школа-интернаттың директору Сылдыс Монгуш-биле катай көргүзүп бараалгаткан. Тыва далгандан чаагай амданныг борбакчыгаштарны кылыры, чем кылырынга болгаш хостуг үени эки эрттирериниң арга-мергежилин экижидеринге тергиин арга болган.

Хемчег «Сделаем вместе!» деп Бүгү Россияның шимчээшкининиң «Школага болгаш бажыңга кадык чемненилге»/ «Здоровое питание в школе и дома» деп төлевилел иштинде, а ол ышкаш тускай шериг операциязында киржип турар шеригжилерге деткимче кылдыр эртип турар. Мастер-классты ТР-ниң Дээди Хуралының депутады Елена Ховалыг, ТР-ниң өөредилге сайыдының бирги оралакчызы Орлан Соян база ТР-ниң Бичии уругнуң эргезиниң талазы-биле бүрүн эргелиг төлээзи Сайзана Товуу олар барып көрген.

Кулинарлыг мастер-класстың иштинде уругларның тыва далгандан белеткээни чаагай болгаш амданныг «борбакчыгаштарын» СВО киржикчилеринге гуманитарлыг дуза кылдыр чаңгыс аай штабче дамчыдар, а ооң соонда шеригжилерже Шагаа байырлалында чоргузар.

#минобразованиятыва #ТоолзугТоолай #шагаа2023 #поддержка #СделаемВместе