Республиканың школаларының 6 муң ажыг 9-ку классчызы орус дыл эртеминде түңнел кады чугаалажыышкынны (собеседование) дужааган. Кады чугаалажыышкынны чедиишкинниг эртип алыры оларга күрүнениң түңнел аттестациязынче киирери болур.

Түңнел кады чугаалажыышкынның киржикчилеринге дөрт даалганы күүседирин саналдаар: сөзүглелди дыңналдыр номчууру, ону немелде медээ ажыглап катап чугаалаары, шилип алган темаларының бирээзи-биле монологтуг илередири болгаш экзаменатор-себеседник-биле диалог. Ажылды күүседиринче 15 минут бердинген, а кадыының байдалы-биле кызыгаарлыг киржикчилерге, инвалид уругларга база инвалид улуска ажылды күүседиринге 30 минута улгаттырган.

Шенелделерниң киржикчилериниң чугаалап турары-биле, олар улуг эвес дүвүрээн, а 11 биле 17 дугаар школаларның өөреникчилери боттарының сактыышкыннары болгаш сагыш-сеткил хайныышкыннары-биле үлешкен.

Кызыл хоорайның 17 дугаар школазының өөреникчизи Айлуна Ооржак: «Хөй сагыш-човаашкын болган. Хөй кезииниң девидеп турганын эскерген мен, ынчалза-даа, кажан аудиторияже кире бээримге, шупту дүвүрелим чиде берген. Меңээ үш дугаар даалга таарзынды, ында бодунуң чайгы хүнүнүң дугайында чугаалаары...».

«Кады чугаалажыышкынның мурнунда бичии сүрээдээн мен, эртемденнер болгаш оларның ажыдыышкыннарының дугайында чыындыларны номчаан мен» - деп, Кызылдың 11 дугаар школазының 9 «е» клазының өөреникчизи Оттук-Даш Кара-Донгак сактып чугаалаан.

Түңнел кады чугаалажыышкын зачёт/зачёт эвес деп үнелеттинер дээрзин сагындыраалыңар. Кол хүнүнде багай түңнел алган таварылгада азы чөптүг чылдагаанныг чок турган болза, өөреникчилер немелде хүннерде катап дужаап алыр эргелиг – 2023 чылдың март 15 биле май 15.

#минобразованиятыва #гиа2023 #огэ #итоговоесобеседование