2023 чылдың февраль 1-ден 10-га чедир Тываның школаларының өөреникчилеринге изиг чем хандырылгазының шынарының хыналдазын ада-ие комитеттери, регионнуң өөредилге яамызы, кожууннарның өөредилге эргелелдери, «Чаңгыс демниг Россия» партиязының депутаттары чоруткан.

Школаларның кухнязының болгаш чемненир залдарның арыг-силиин, чемненириниң чурумун, чемнерниң янзыларын, аяк-савага үлүглериниң , өөреникчилерниң чемненириниң үе-шагын айыткан чурум бижиин, оларның чемненириниң организастаарының чогуур документилерин комиссия хынаан. Үстүнде айыттынган барымдааларга хамаарыштыр шыңгыы шүгүмчүлел илереттинмээн.

Хыналданы чорудуп турар комиссия кежигүннери өөреникчилер-биле ужуражып, изиг чем хандырылгазының дугайында олардан айтырып, сонуургаан. Эртенги болгаш дүъштеки чемниң шынары эки дээрзин уруглар үнелээн.

"Школа столоваяларынче ада-иелерниң кирериниң чурумунуң дугайында дүрүм" ёзугаар уругларга изиг чем хандырылгазының шынарын ада-иелер комиссиязы ай санында хыналданы чорудуп турарын сагындыраалы. Күзелдиг ада-иелер комиссияже кирип алгаш, школалар столоваяларын хынап болур. Өөредилге албан черлериниң сайтыларында хүн бүрүде чемниң менюзун үндүр салып турар.

Регионнуң школаларында уругларны изиг чем-биле хандырарының хыналдазын, ада-иелерден болгаш өөреникчилерден кээп турар хомудалдар-биле ажылды Өөредилге яамызы доктаамал кичээнгейге хынап турар. Республикада уругларга изиг чем хандырылгазының дугайында айтырыгларны болгаш хомудалдарны яамының «изиг шугум» телефонунче дамчыдып болур: 8-(39422)-64381.

#минобразованиятыва #детскоепитание #горячеепитаниевшколах #здоровьедетей