Март 1-ден эгелеп, Россия Федерациязының 85 субъектизинде «Россия – аргалар чурту»/ «Россия – страна возможностей» деп президентиниң платформазынче кирип турар «Абилимпикс» чемпионаттың  регионалдыг чадазы эгелээн.

Бо чылын чемпионатка Тывадан 163 киржикчи 17 аңгы мергежилге киржир, ол: чинчи эжип-аргыыры, ыяшты оюп-хээлээри, уран угулзалап даараары, чазаныр ажыл, даараныкчы, повар, чурумалдыг уран чурулга, идик септээри, веб-дизайн, очулдурукчу, эмчи болгаш социал ажаап-карактаары, сөзүглел ажылдап кылыры, спицалар-биле аргыыры, а ол ышкаш 2 регионалдыг мергежилге – тыва хуужуур биле алгы-кеш ажылы (кымчы баан кылыры).

Апрель 10-дан 14-ке чедир 8 албан чериниң баазазынга маргылдааның регионалдыг шөлчүгештери ажылын эгелээн – Кулаа дыңнавас уругларның школа-интернады, № 10 школа, Тываның тудуг техникуму, Тываның информация технологияларының техникуму, Республиканың медицина колледжизи, Тываның күрүне университеди, «Бүгү Россияның күш-ажылдың кызыл тугунуң ордени» / «Всероссийского ордена трудового красного знамени» Тываның Республиканың инвалидтер ниити российжи хөй-ниити организациязы.

Тиилекчилер чылдың-на болур «Абилимпикс» Национал чемпионатка, Москва хоорайга 2023 чылдың октябрь 17-ден 25-ке чедир болур маргылдаага киржир. Бүдүн чуртка маргылдааның программазының иштинде киржикчилер 214 мергежил аайы-биле боттарының профессионал уран мергежилин болгаш усчу ажылын бараалгадыр.

Профессионал уран мергежил талазы-биле маргылдаадан аңгыда, киржикчилерге ажыл-херекчи болгаш өөредиглиг программалар, мастер-класстар, хостуг ажылдар ярмарказы көрдүнген.

«Абилимпикс» чемпионаттың организаторлары кылдыр «Россия – аргалар чурту»/ «Россия – страна возможностей» АНО-нуң болгаш «Абилимпикс» Национал төптүң деткимчези-биле «Абилимпикс» хөгжүлде шимчээшкининиң регионалдыг төвү болуп турар.

Архивтен чуруктар.

#минобразованиятыва #абилимпикстыва