«Лидер» элээдилер төвүнде барып турар Тываның кадет корпузунуң өөреникчилери, аар балыгланза-даа, чүгле бодунуң эвес, а ийи уругнуң база амы-тынын камгалааш, ады-сураа бүгү чуртта алгый берген үе-чергези Фёдорга өөрүп четтиргенин илереткен ажык чагааны чоруткан.

Марттың эге хонуктарында, Брянск облазынга үш школачыны – үшкү классчы Федор база ийиги классчы уругларны орукка сөөртүп чораан «Нива» автомашинаны украин диверсантылар атканын сагындыраал. Чолаачызы ол-ла черге чок болган, а оол балыгланы бергенин безин билбээн. Ол кады чораан уругларны машинадан үндүргеш, арыг иштинче чаштып дезе бергеннер...

Россияның Истелге комитединиң даргазы Александр Бастрыкинниң даалгазы-биле, эрес-дидим болгаш маадырлыг чоруу дээш 10 харлыг Фёдорну албан чериниң «Шылгарал болгаш эрес-дидим чорук» деп медаль-биле шаңнаан.

Тывадан оолдар, кыстар Брянск облазындан коргуш чок оолга өөрүп четтириишкинниң база чоргааралдың сөстерин дамчыдып, дүрген сегип келирин, өөредилгезинге чедиишкиннерни, тайбыңны болгаш аас-кежикти күзээн. “Кады бис!” – деп, Федяга бижээннер.

#минобразованиятыва #героисрединас #брянскаяобласть