Апрель 3-тен 7-ге чедир республиканың девискээринде Кадык амыдыралдың аян-шинчи неделязының иштинде хемчеглер эртип турар. Ук хемчегни апрель 7-де демдеглеп турар Бүгү делегейниң кадыкшыл хүнүнге тураскааткан.

Кадык амыдырал неделязында профессионал ортумак өөредилге албан черлеринде студентилерге янзы-бүрү хемчеглерни эрттирип турар. Шак ынчалдыр, Тываның тудуг болгаш Тываның көдээ ажыл-агый техникумнарынга спортчулар-биле ужуражылгалар эртип турар. Тываның тудуг техникумунга студентилер-биле Тыва Республиканың Спорт яамызының база Регионнуң айыыл чок чоруунуң департаментизиниң төлээлери-биле ужурашкан.

Хемчегниң аалчылары - Регионнуң айыыл чок чоруунуң департаментизиниң специализи Камилия Салчак, «Олимп» олимпийжи курлавырының спорт школазының тренери Сай-Херел Тюлюш, «Тыва» спорт школаның тренери Кайгал-оол Донгак, Тыва Республиканың Арзылаң мөгези Ай-Демир Монгуш, кикбоксинг талазы-биле Россияның алдарлыг спорт мастери Сергек Ооржак база Тыва Республиканың спортчу чыынды командалар белеткээр төптүң кикбоксинг талазы-биле кол тренери Алибек Монгуш.

Ужуражылга үезинде аалчылар студентилерге кадык амыдыралды чорударының, маргылдааларга киржип турганының база белен эвес сегиржип алыышкыннарда хөй санныг шаңналдарны канчаар тиилеп, чедип ап турганының дугайында сактыышкыннарын чугаалап берип үлешкеннер. Аалчылар кижи бүрүзү кандыг-даа эгелээшкиннерни эгелеп шенээр ужурлуг болгаш, ниитилелге ажыктыг болур дээрзин демдеглээн. Ужуражылга соонда аалчылар студентилерге чагыг-сүмезин, чедиишкиннерни болгаш өөредилге биле спортту деңге чорудуп турарын сүмелээн.

Шак ындыг ужуражылгалар өзүп орар салгалга база аныяктарга улуг идиг бээр.

#минобразованиятыва #НеделяЗОЖ #воспитание_в_спо #спо_рт