Республикада уругларның чайгы дыштанылга лагерьлериниң планнарында  «Тыва дыл хүнү» тускай турушту ээлеп турар. Бо чылын ук хүннү Улуг-Хем кожууннуң Чодураа школазының лагери, Кызылдың 9 дугаар гимназиязы эгелээннер.

Бөгүн Кызыл хоорайның 2 дугаар школазының лагеринде тыва дыл хүнү. Школаның баазазында ажылдап турар чайгы лагерьниң уруглары төрээн дылының хүнүнде тыва хептиг дыштанып келгеш, янзы-бүрү солун хемчеглерге киришкеннер.

Сургуулдар тыва улустуң «Бистиң Тыва» деп ырызын, «Челер-ой» болгаш дүк салыкчыларының самын күүседип, даалы, кажык ойнап, тывызыкташканнар. Школаның башкызы Ольга Күжүгетовна Сарыглар уругларга тыва дылдың үннериниң онзагайларынга хамаарышкан кичээл-оюннарны эрттирип, чаштарның шын адалгазын сайзырадырынче улуг кичээнгейни салган. Бир кезек уруглар оюннар ойнап турда, чамдык өөреникчилер тыва чогаалдарны аразында хуваажып алгаш ойнай аарак номчааннар.

Тываның культуразының, төөгүзүнүң, географтыг онзагайларын болгаш ужур-чаңчылдарын барымдаалап тургаш, тыва дылга, чогаалга, национал оюннарга хамаарыштыр янзы-бүрү хемчеглерни холбап тургаш, Тываның өөредилге яамызының Национал школа хөгжүдер институду «Төрээн черивистиң хүнү» деп методиктиг сүмелерни ажылдап кылгаш, лагерьлерге ажыглаар удуртулга кылдыр дамчыдып бергенин сагындырып каалы.

#минобразованиятыва #тывадыл #лок2023 #ДеньРодногоЯзыка #ирнш #роднойязык