Бөгүн, февраль 29-та Өвүр кожуунга Барыын кожууннарның «Шагааның ак айында» деп школа назыны четпээн уруглар албан черлериниң кижизидикчи башкыларының семинары болуп эрткен.

Тываның Өөредилге яамызының ниити билиглер салбырының специализи Урана Допул чыылган башкыларга шагааның ак айы-биле изиг байырын чедирбишаан, школа назыны четпээн уругларга тыва дылдың болгаш тыва чоннуң культуразын бичии чаштарга өөредириниң чугулазын демдеглеп, байырлыг байдалга хемчегни ажыдып, өөрүп четтириишкин бижиктерин тывыскан.

Өвүр кожууннуң Өөредилге эргелелиниң даргазы Мариса Начын база чыылган башкыларга шагааның ак айында чедиишкиннерни күзеп, сөстү алган. Келген башкыларны Өвүр кожууннуң башкылары мергежээн кичээлдери-биле кайгаткан. Мөңгүн-Тайга кожууннуң башкылары ук кожуунда Шагааның ак айында ойнаар тыва оюннарының онзагайын көргүскеннер. Чөөн-Хемчик кожууннуң шылгараан башкылары улустуң аас чогаалын Шагаа үезинде уруглар садтарынга өөредип турарының дугайында хемчеглерни сонуургатканнар.

Ук өөредиглиг хемчег Өвүр кожууннуң Солчур школазының салбырынга болуп эрткен. Школаның директору Арыя Доңгак дөрт дугаар чыл удуртуп турар. Уруглар садында ийи школаже белеткел бөлүктер бар, 1 улуг кижизидикчи башкы, 4 кижизидикчи башкы болгаш музыка башкызы ажылдап турар.

Хемчегге ниитизи-биле 91 уруглар садтарының удуртукчулары болгаш кижизидикчи башкылары киришкен. Өөредиглиг семинарның киржикчилериниң ажылдарын чаңгыс аай электроннуг чыынды ном кылдыр үндүрерин Национал школа хөгжүдер институт хүлээнип алган.