Часкы тарылга ажылдарының эгелээни-биле, көдээ ажыл-агый кластеринде техникумнарның сургуулдары өөредилге-бүдүрүлге практиказынче үнүп, хову ажылдарында хаара туттунган.

Көдээ ажыл-агый техниказын база дериг-херекселин ажыглаар болгаш септээр талазы-биле специалист мергежилди чедип ап турар үшкү курстуң сургуулдары Кызыл кожууннуң Кара-Хаак сумузунда 50 га черни чардырып эгелээн. Техникумда көдээ ажыл-агый автопарыгы бар. Чардырар черни өөредилге черинге республиканың бир көдээ ажыл-агый бүдүрүкчүзү хөлезиге дамчыткан. Сургуулдар мал чемин тарыыр сорулгалыг. Көдээ ажыл-агый техникуму мал чеми белеткээр цехти ажытканын сагындыраал. Ол чурттакчы чон ортузунда хереглелди алган.

Техникум - "Профессионалитет" федералдыг төлевилелдиң күүседикчизи, ооң баазазы Тываның агробүдүрүлге техникуму болуп, амгы үениң чаа техниказында чер ажылының чурагайлыг аргаларын ажыглавышаан, часкы хову ажылдарынче кирипкен.